Khiangte Construction Ṭhazual Gospel; Chart chung berah Lalthansangi

Khiangte Construction Ṭhazual Gospel chart thar berah "Heiden rial" tih hla hmanga Zoram dengchhuaktu Lalthansangi chuan a hla thar "Misual ka ni Lalpa min ngaidam rawh" tih chu pakhatna a rawn nihpui ta.

Chart-a tlangnel Thansangi

Ṭhazual Award 2022-a Best Mizo Traditional Artist dawngtu Lalthansangi hi chart-ah hian a tlangnel viau ṭhin; a hla tihchhuahte hian an phu ang ngeiin dinhmun sang tak a chelh ṭhin a, tuna a hla thar pawh hian kar eng emaw ti chhung chu hmasawn zawnga a kal hnuah tunah chuan chart roreltu a rawn nihpui leh thei ta der mai. Mizo ze mil taka zai ṭhin a nihna hian mipui mar a dek thiam a, eng hla pawh sa se ama style a kal ṭhin a nihna hian zaithiam pakhat a nih zia a rawn lantir nawn fo ṭhin a ni.

'Hmangaihtu i ni si' & 'Thlarua Rosepar'

Vri Pautu & Kimkima Khiangte ft Murfelo thawhhona hla 'Hmangaihtu i ni si' chu palina aṭangin pahnihnaah a rawn inhlangkai a, he hla thu entir nei ṭha tak hi Murfelo phuah a ni a, pakhatna a nih pawhin a mak lo ang.

Mizo Idol aṭanga kan hriat lar, Thawhlehnaniropuia "Thlarau Rosepar" chu pathumnaah awmin, he hla mawi tak hi Rosangliana (Zorock) phuah a ni.

Tute nge lo lang

One In Christ member, Christina Vanlalnghaki'n thla liam taa a tihchhuah "A rintlak si a" chu palinaah rawn langin, Mizo Idol Season 7-a top 5 hial inhlangkai thei Angaihi Fanai MV thar "I lamah a ṭang Lalpa" chuan top 5 hmawr a rawn bawk a ni.

Hei bakah hian, Ruth G, One in Christ, Seraphic Choir, Vanlalneihpuii leh H. Lalruatpari-te chu chart-ah an rawn lang bawk.