Stacy VL Muanpuii'n MV thar "Rorelna Ni" tichhuak dawn

Mizorama hmeichhe gospel ṭha bik, Stacy VL Muanpuii chuan music video thar "Rorelna Ni" tih chu a tichhuak dawn a, Zonet Cable TV-a pekchhuah a nih hnuah, Stacy-i YouTube channel "Stacy VL Muanpuii"-ah Ningani aṭang hian dun huna ngaihthlak theih turin upload a ni leh ang.

Tuikual Branch KṬP Leader, Pu R.Lalhmangaiha chuan Pathianni zan khan "Rorelna Ni" music video hlanna hun hi a nei a ni.

A phuahtu lam

He hla phuahtu leh thluk siamtu hi John Lalrinawma (Alpha Recording Studio, Zarkawt neitu) niin, music track pawh hi ama kutchhuak vék hi a ni. Recording hi Bluewave Records, BZ-a Chanmari West kutchhuak niin; video lama sulhnu nei ṭha Lalnunsiama, (One Vision Gospel Media) siam a nih avangin a hmuhnawm dawn tih a chiang.

A hla lo pian dan

"Rorelna Ni" tih hla hi John Lalrinawma'n kum 2005 vela a phuah niin, "Pathian lo kal lehna tur chu ka mumangah ka hmu a, chiang tak leh fiah takin Isua hi a lo kal leh ngei dawn a ni. Kan awm dan tur zawng zawng hi ka hmulawk a. Zing ka thawh pawn ka mumang chu a chian em avangin ka theihngilh thei lo a, ka mumang aṭang chuan he hla hi vawikhatah ka ziak chhuak nghal vek a ni," tiin a hla lo pianchhan a sawi.

Back-up vocals lamah zaipawl lama sulhnu nei ṭha Dr Zoa, Nunui Chhangte, Famkima leh Abe-a ten ṭha takin zai an cheimawisak bawk.

Rinawma hian tun hmain Pathian fakna hla ṭha tak tak a lo phuah tawh ṭhin a, Alpha Various Artist Collection album-te pawh lo ti hhuak tawhin, gospel singer-te tan a thawh hlawkin sulsutu pawimawh tak a ni. Mizo ir awm chhuaka kan la hmuh ngai zen zen loh chord danglam tak kan hmu bawk dawn a ni.