Coachella-ah Blackpink-in min barakhaih; Punjabi singer inlan hmasa ber Diljit Dosanjh

Blackpink chuan an ze ngai an chhuah leh ta!

Coachella 2023-ah K-pop girl group hian mipui an lo ṭhawng thut a, arsi eng mawi tak ang maiin stage-a an che vel pawhin hmuhnawm titu a ngah narawh e.

BP hian Coachella 2023 hi "Pink Venom" tûr hmangin mipui an hrai rui te te phawt a, "Kill This Love", "How You Like That", "Kick It", leh an hla thar "Whistle" hmangin mipui an suk tir dual dual a ni.

Jennie chuan a hla la tihchhuah loh "You and Me" chu a vawi khatna atan a rawn sa a, Korean rapper che vel pawh a hmuhnawm ngaiin a la hmuhnawm reng.

BP member upa ber Jisoo chuan a debut song "Flower" chu kawr sen mawi tak nen mipui sahawk tawh sa chu arawn chhem nun belhin, ni 16 liam ta chauha tihchhuah ni mah se, fans te erawhin a hla thu an lo thiam bel hman tawh hle.

Rosé chuan a solo "On The Ground" bakah "Gone"-a a hla ṭhenkhat rawn sa bawkin, Lisa chuan a hla hit "Money" a rawn thlawh chiah chu mipui zingah ṭhu mai mai an awm thei lo a, pole dance a thiam zia a rawn lantir bawk a ni.

India tan mellung pawimawh

Punjabi singer Diljit Dosanjh chuan khawvela music festival lianah mellung pawimawh tak phunin, Indio, California-a neihah Punjab mi zinga inlan thei hmasa ber a ni. Diljit hian Pathianni khan performance ṭha tak rawn neiin, a hla hit eng emaw zat a rawn perform a ni. Diljit-a co-star leh Bollywood lama a ṭhiante Arjun Kapoor, Kareena Kapoor leh Alia Bhatt-te pawhin lawmpuina thu an hlan.