Rimawi khawvelah Taylor Swift ropuina belhchhahin a awm zel

American Music Awards Artist of The Decade leh Billboard Woman of the Decade Taylor Swift chuan a album thar puangzar lawk lem loa a tlangzarh 'Folklore' chu Billboard 200 chart-ah No.1 a ni nghal a, Logic 'No Pressure' chu pahnihna niin Juice WRLD 'Legend Never Die' chu pathumna a ni bawk.

Taylor Swift-i'n 'Folk­lore' a tlangzarh tirh khan ram hrang hrang bakah Billboard 200 chart-ah No.1 a ni dawn tih hre lawksa tur hian zawlnei nih a ngai lo. Huhang a ngah dan leh a record neihte thlirin ram hrang hrang chart-ah No.1 a hauh nghal dawn tih a chiang sa a ni.

July 24-a a tlangzarh 'Folklore' hi US-ah ringawt tlangzarh karah khan  846,000 equivalent album unit a hmu chhuak nghal a, nikuma a tlangzarh 'Lover' hnua US-a tlangzarh kara album hralh ṭhat ber a ni a; mahse 'Lover' ai chuan a hralh tlem hret. 'Lover' kha tlang­zarh karah 867,000 equi­valent album unit a hralh.

Swift hian a hmain Fearless, Speak Now, Red, 1989, Reputation leh Lover-te kha Billboard chart 200 chart-ah No.1 a lo nihpui tawh a, 'Folklore' ni No.1 a nihpui theih album pasarihna niin  Janet Jackson nen hmeichhe zinga Billboard chart 200 chart No.1 neih tam lamah pathumna an ni ta a, Barbra Streisand (11) leh Madonna (9)-te a la tluk lo. Billboard chart-a No.1 album ngah ber chu The Beatles kha niin album 19 an nihpui thei a ni.

Taylor Swift ropuina tilang­chiang turin tunah hian CD a la zuar chhuak lo a, Zirtawpni aṭang hian a zuar chhuak dawn chauh. Chumi awmzia chu heng album unit a hmuh­chhuahna hi digital aṭang chauhin a la ni.

American rapper Logic album 'No Pressure' chu Billboard 200 chart-ah hian pahnihna a ni a, kar hmasaa pakhatna leh kar hnih chhung pakhatna ni tawh rapper fam ta Juice WRLD album 'Legend Never Die' chu pathumna  ani ta thung a ni.

Taylor Swift 'Folklore' leh Logic 'No Pressure'-te bakaha hian chart-a album lang thar pakhat a la awm chu, chu chu pariatna The Kid LAROI 'F*ck Love' a ni. Pop Smoke 'Shoot For The Stars Aim For The Moon' chu palina a ni a, Original Broadway Cast 'Hamilton: An American Musical' chu pangana ni bawkin kar 253 chhung he chart-ah hian a lang tawh.

1    Folklore    Taylor Swift

2    No Pressure    Logic

3    Legends Never Die    Juice WRLD

4    Shoot For The Stars Aim For The Moon    Pop Smoke

5    Hamilton: An American Musical    Original Broadway Cast

6    Wunna    Gunna

7    My Turn    Lil Baby

8    F*ck Love    The Kid LAROI

9    Hollywood's Bleeding    Post Malone

10    Fine Line    Harry Styles