Billboard-ah Morgan Wallen tluk zo thei an la awm lo

Kum 20 mi lek ni chunga TV show ṭhangduang tak "The Voice" 2014 aṭanga a hming rawn chher a, tunlai country music khawvela thawm nei lian ber tiha chhal ngam - Morgan Wallen chuan kar hmasa ang bawkin Billboard Hot 100 leh 200 album chart-ah a lallukhum a la humhim chhunzawm zel a, chart chung ber a luah chhunzawm a ni.

"Flowers" paih thla thei

"Last Night"

Morgan Wallen aw(voice) hi a fiah ṭhain, a aw tham chal mai te hian lawmtu a ngah hle. Zaia ei a zawn hmain Knoxville, Tennessee-ah landscaper hna a thawk ṭhin. A hla thute hi Bible, hmeichhia, whiskey, inchhirna lam, "redneck" ṭawngkam tharthawhna lam hmuh tur a tam ṭhin hle.

“Last Night” hi Hot 100-ah kar thum chhung pakhatna dinhmun a hauh tawh a, Miley "Flowers" vul vang laia khum theitu a nih avangin dah hniam theih a ni lo ang.

Drake hla thar thawm nei lian tak, “Search & Rescue” chu pahnihnaah rawn invawrhin, kumina hla lar ber pawl Miley Cyrus “Flowers” chu pathumnaah a la inhamtang.

Kumina album hlawhtling ber

Hla 36 zet awmna "One thing at a Time" album hi kum 2023 chhunga album stream tam ber a nih thu Spotify chuan a tarlang. Kum 2021-a a tihchhuah, hla 30 awmna "Dangerous: The Double Album" pawh kha a hlawhtling hle a, Bad Bunny leh Harry Styles-te chiah phak loin, kum 2022 chhungin US bikah album stream hnem ber pathumna a ni a, Taylor Swift "Midnights" meuh pawhin a phak lo.

A album thar ber, "One Thing at a Time" hian kar liam ta chhung khan equivalent unit 1,67,000 hmuchhuak lehin, a zawnin kar sarih chhung pakhatna a ni tawh.

American rapper NF studio album pangana, "Hope" chuan equivalent unit 1,23,000 hmuchhuakin pahnihnaah a rawn debut bawk a, pathumnaah hian tu dang ni loin, Eras Tour hlawhtling taka kalpui mek Taylor Swift "Midnights" kan hmu leh a ni.