Zirtawpniah Ed Sheeran hla thar "Boat" a chhuak dawn

Ed Sheeran studio album pangana tur, "Subtract"-a single pahnihna a hriat ta a, he album-a a hla phuah hmasak ber leh a hmawr a bawkna ni bawk "Boat" tih hla chu a tlangzarh dawn. A hla pum leh video te hi April 21, Zirtawpni hian tlangzarh a tum thu IG kaltlangin a puang.

Ed Sheeran hian kumin February thla khan "Subtract" album a tihchhuah tur thu hi social media platform aṭanga puangin, album a hlate chu "ka thinlung khartu chhuah zalenna" tiin hei hian a hla hawi lam a tichiang mai awm e. "Subtract" album hi Taylor Swift Folklore (2020), leh Evermore (2020) album-a kuthnu kan lo hmuh tawh, Aaron Dessner nen thawkduna an phuah a ni. Sheeran leh Dessner hian thla khat chuang chhung chu studio-ah hian hla buaipuiin hun an hmang a, hla 30 vel an phuah hman a, hla 14-ah thlifim lehin heng hla 14-te hi album tharah hian kan ngaithla thei dawn a ni.

Ed Sheeran hian mathematical sign hmangin album hi a lo tichhuak ṭhin a, chung zinga a hnuhnung ber tur chu "subtract" album hi a ni. He album-a single hmasa ber “Eyes Closed.” tih chu a lo tlangzarh tawh a, May 5 hian album pumpui hi tlangzarh tura ruahman niin, May 3 hian Disney+ chuan Ed Sheeran chanchin four-part docuseries "The Sum of it all" chu an pechhuak bawk.