Travis Scott kalsanin Kylie-i'n Timothee lam a hawi

Kylie Jenner chuan a fa pahnih Stormi(5) leh, Aire(1)-te pa, Travis Scott chu kalsanin lemchanthiam Timothee Chamalet lam a hawi niin khawthlang media-te chuan an tarlang.

Kylie SUV dum chuan kartir lam khan Timothee mansion-a panlai hmuh a lo ni tawh a, hei hian an inkarah rinhlelhna tam tak a rawn piantir zui a ni.

Reality TV personality leh Timothée-te hian an inkar chungchangah thuchhuah siam an la nei lo a, vantlang hmuhah an la inzui lo bawk.

Report tarlan danin, Kylie hian Coachella festival-a a kalnaah Timothee nena an chungchang hi official-a sawichhuah a la duh loh thu a sawi a, mahse an pahnih hian January thlaa Paris Fashion Week neihna aṭang khan an inhnimhnai hle tih an sawi.

Entertainment Tonight chuan Kylie leh Timothée te hi an in date ngei tih an nemnghet tawh a, Kylie hian an inkar thuhlaah hmanhmawh ngai thil a awm loh thu sawiin, a ṭhiante kiangah hun hman rih a thlang zawk tih a sawi a ni.

Kylie leh a kawppui hlui Travis Scott-te chuan February 1, 2018 khan an fa upa zawk Stormi an nei a, kum 2019 khan an inkar chu an tihtawp lailawk thu an puang zui a ni. February 2020 khan inzui ṭan lehin, an fa pahnihna Aire chu February 2, 2022 khan an nei leh a ni. Kumin January thla a rawn inherchhuah leh meuh chuan an inkar a tawp thu kan hre zui leh. Hetiang deuh chiah hian Kylie hian rapper Tyga nen 'on & off relationship' an neih hnuah kum 2017 khan an inkar hi an lo titawp tawh bawk.

Timothée Chalamet pawh hian milar rual a lo kawp ve fur tawh tho mai. Chung zingah chuan zaithiam Madonna fanu, Lourdes Leon te, lemchanthiam Johnny Depp fanu Lily-Rose Depp leh, singer-actor Eiza González te nen an lo inzui tawh a ni.