Miss India 2016 Finalist Aishwarya Sheoran UPSC civil service exam-ah 93-na a ni

Union Public Service Commission (UPSC) exam result a chhuah apiang hian thil ngaihnawm deuh eng emaw ngaihven tur a awm ve deuh ziah a, chutiang thil ngaihnawm tak eng emaw chu kumina inziak tling zingah pawh hian a awm leh nual dawn niin alang; Thawhlehnia UPSC result chhuaka 93-na Aishwarya Sheoran kha kum 2016 Miss India Finalist a ni tlat!

"Ka nuin ka hming hi Aishwarya tia a sak chhan chu Aishwarya Rai vang kha a ni a, Miss India ni turin min duh a ni," tia sawitu Aishwarya Sheoran hi Miss India 2016 Finalist 21 zingah khan a tel a, list-a a hming a lan hnua reporter-te'n an kawmnaah hemi chungchang hi a sawi.

Aishwarya chuan Civil Servant nih chu a chak reng thu leh a duhthusam pawh a nih thu sawiin, a duhthusam tipuitling tur chuan a modelling career aṭanga chawlh lain Civil Services Exam hi a pe ta a ni. Delhi Times Fresh Face 2015-a winner a nih hnuah Miss India-a tel tura thlan a ni leh a, modelling lamah hun tam tak a hman hnuah tunah chuan a duhthusam a tihlawhtling ta a ni.

Sheoran hi academics lamah a ṭha hrim hrim a, tunah pawh hian coaching class a kal miah lo niin media ṭhenkhat chuan an tarlang. Mahse lehkha erawh a zir nasa hle a,"Ka phone ka off a, social media leh engkim ka chawlhsan a, exam lam chauh ka hawi a tunah erawh a rah ka hmu ta a ni. Lehkha zir lam hi ka uar thut erawh a ni lo a, zirna lamah hian ṭhahnem ka ngai reng ṭhin a ni," tiin a sawi bawk.

Science student ṭhin niin a hnuah Sri Ram College of Commerce-ah  a kal leh a ni.

Modelling lamah pawh sulhnu a nei ṭha hle a, Bombay Times Fashion Week, Lakme Fashion Week leh Amazon Fashion Week-ahte pawh a lo inlan tawh a, designer lar Manish Malhotra tante pawh a inlan tawh a, Designer-te bakah magazine tante pawh model-ah a lo ṭang tawh bawk.