Mizo zinga Supreme Court-a AOR tling hmasa ber JC Lalnunsanga - 'Mizote hmakhaw ngaiin theihtawp chhuahin ka bei a ni'

Supreme Court-a practise mek JC Lalnunsanga chu Supreme Court-a Advocate-On-Record (AOR) ni turin a inziaktling a, Mizo zinga inziaktling hmasa ber a ni. Mizote hmakhaw ngaia AOR ni tura bei a nih thu a sawi.

Vanglaini palai zawhna chhangin, JC Lalnunsanga chuan Mizo mipuite tan a ṭangkai theih beiseia AOR ni tura theihtawp chhuah a nih thu a sawi a, "Mizote hian Supreme Court lamah thubuai kan nei chho ve zel a, neih pawh kan la nei zel dawn. Sum tam tak sengin hnamdang an ruai a, an ding ṭha lo ṭhin bawk si. Chuvangin, Supreme Court-a ding thei tur Mizo ngei an awm hi ka lo suangtuah ve ṭhin a, ka suangtuahna ka ti hlawhtling thei hi ka lawm khawp mai," a ti.

JC Lalnunsanga chuan Mizo dangte pawhin AOR ni turin theihtawp chhuah se a duh thu sawiin, "Mizoten kan thiam chi tak niin ka hria. Rawn bei duh an awm a nih phawt chuan puih ka inhuam. Mizo ukilte hi kan inzar pharh ve a ngai," a ti a, Mizoramah ringawt chuan in ṭam chhuah hun a thlente pawh thil hlauhawm a nih thu a sawi.

Mizorama law firm nei, JC Lalnunsanga chuan chan huama Supreme Court-a ding thei tura Delhi a pan thu sawiin, "Mahse ka vannei khawp mai. Chan huama chhuk ka ni chungin ka chan lo a, AOR lo nei tawhsate'n min chhawr chhawng a, case ka ngah ve ṭhin hle. Ka lawm khawp mai," a ti.

Supreme Court-ah hian AOR kaltlang loin eng case mah putluh leh sawi theih a ni lo. AOR exam tur hian Supreme Court-ah kum 4 practice a, Senior AOR hnuaiah kum 1 training chhuah leh a ngai.

JC Lalnunsanga hi Lunglei Venglaia pianga seilian a ni a, Class XII thleng chu Lunglei Venglai leh a chhehvelah a zir a ni. Kum 2008 khan Mysore University hnuaiah BAL, LLB a zo a, Mumbai-a corporate firm-a thawh pahin LLM (Corporate Law) chu kum 2010 khan a zo leh a ni. State pawn leh Supreme Court-a rei vak lo a practice hnuin Mizoramah a practice chhunzawm.

Kum 2020 aṭang khan Supreme Court lamah practice chhunzawm lehin, a nupui fanaute nen Delhi lamah an awm mek. Mizoram lama Law Firm a neih tho avangin Delhi, Guwahati leh Aizawl hi a kar tawn reng ṭhin.

Vanglaini thudawn danin, Supreme Court-a Advocate-On-Record hi hmarchhak state (Assam tiam lohin) ah pawh an la awm vak lo a, JC Lalnunsanga hi a palina vel nia hriat a ni.