Aaron Carter kha tihpalh thilthua thi a ni tih hmuchhuak

American singer leh rapper, November 5, 2022 a kum 34 mi nia fam ta Aaron Carter thih chhan chu accident vang a nih thu zirchianna kalpuitu Los Angeles Medical Examiner-te chuan an puang.

Backstreet Boys singer, Nick Carter-a unaupa Aaron hi November 5 khan a chenna Lancaster, California-ah thia chhar a ni a, khatih lai khan a thihchhan hi puanzar a ni lawk lo. Mahse autopsy report thar berin a tarlan danin,a thihchhan chu difluoroethane leh alprazolam damdawi hnathawh avanga thi a nih thu an tarlang.

Toxicology report chuan air spray cleaner gas atana hman tlanglawn tak, rilru ti hlima; ruihna thlen thei difluoroethane an hmuh bakah, mut ti chhuaka taksa tizawitu Alprazolam damdawi chu a taksaah hian an hmuchhuak tih an sawi.

Zirchianna kalpuitute sawidanin, medical responder te'n Carter-a ruang hi bathtub-ah an hmuh thu an sawi a, compressed gas leh alprazolam a hip luh hnem avangin a taksa chu che thei loin; tub-a tuitlingah chuan inhnim lut zuiin a thaw chu a chham zui a ; a thi zui ta mai tih an sawi.

Carter hian kum kalta aṭang tawhin ruihhlo bawihah a tan thu hi a pha ngai lo a, a fapa a enkawl let theihnan September 2022 khan rehab-ah a luh thute pawh a lo sawi tawh a ni.

Naupangte a nih lai aṭangin mi mitfukna a ni nghal a, hei hian loh theih lohin a nunah nghawng tam tak a neih ṭhin thute a sawi. Rimawi lamah pawh a hlawhtling thawkhat hle a, "Aaron’s Party (Come Get It)" leh "Oh Aaron" chu platinum-selling album a kaipui thei a ni. Hei bakah hian, Backstreet Boys concert eng emaw zat leh, Britney Spears "Oops!… I Did It Again" tour-te pawh a lo khuhhawn sak tawh bawk a ni.