Kum mtd 67-a upa T-Rex ruhro USD mtd 6 chuangin hralh

Kum maktaduai 67 vel liam taa he kan chenna leilunga cheng tawh, Tyrannosaurus Rex ruhro chu Swiss franc mtd 5.5 (USD mtd 6.13) in Thawhlehni khan Zurich-ah an hralh a, an chhiar aia tlawmin an la hralh zui!

He ruhro feet 12.8 a sang, feet 38.1 a sei TRX-293 Trinity hi U.S. state pahnih, Montana leh Wyoming-a kum 2008- 2023 inkara ruh 293 an chhar aṭanga an remkhawm a ni.

A leitu, a hming tarlan loh chuan Swiss franc mtd 4.8 a chhangin a chhang huai ber a, Swiss franc mtd 5-mtd 8 inkara bawr vela chhut ni mah se, premium leh auction fee nena chhutin USD mtd 6 chuang hian a chang zui ta a ni.

Auction kaltlanga T-Rex skeleton quality ṭha tak hi Europe khawmualpuia an lilam vawi khatna niin, khawvel huap ang pawhin ṭum thum chauh a la thleng tih Switzerland-a auction house lianber, Koller chuan an tarlang. T-Rex ruhro zahve chuang hi original a ni a, a bak zawng hi plaster leh epoxy resin cast aṭanga siam an ni.

North America-a T-Rex model pahnih, Sue leh Stan-te chu lilamnaah kum 1998 leh kum 2020 khan USD mtd 8.4 leh, USD mtd 31 in hralh an lo ni tawh bawk.