Lehkhabu bawm: Lalhmahmachhuana Zofa - "Mizo History, KHUA" tlangzarh

Lalhmahmachhuana Zofa lehkhabu ziah, 'Mizo History, KHUA' tih chu nimin tlai dar 2 khan Robert Romawia Royte, Minister chuan a Office-ah a tlangzarh.

Mizo History, KHUA lehkhabu hi kum 1900 hma lama Zofa chi peng hrang hrangte lo awm tawhna khaw langsar bik deuhte thlang chhuaka ziahna a ni. India, Myanmar, Bangladesh-a kum 1900 AD hma lama khaw langsar deuhte chanchin kimchang takin a chuang a, khaw 700 chuang tarlan a ni.

Lehkhabu tlangzarh inkhawmah hian, Rev. R.Laldika'n hunserh a hmang a; Michael Lalthanmawia, ZORO History Committee Chairman-in lehkhabu thlirlawkna a nei a, K.Lalthlamuankimi, Youth Icon chuan Lalhmachhuana Zofa hla phuah, 'Ih Maw Duhlai' tih chu thiam takin a sa bawk.

Lehkhabu tlangzarhntu Robert Romawia chuan, "Lehkhabu hi tlang hrang hranga chi leh kuang khatte min hûi khawm a, min tipumkhat theitu a ni a, khawvel huapah pawh hnam anga rual kan pawlna atan leh hriatna leh thiamna zau zawk kan neih theih nan Mizote hian lehkhabu kan chhiar tam a ṭul a ni," tiin lehkhabu ziaktu Lalhmachhuana Zofa chu a kal leh zelna turah duhsakna a hlan bawk.

Mizo History, KHUA (kum 1900 AD hma lam) hi Pu Lalhmachhuana Zofa-in lehkhabu a tihchhuah 157-na niin, tun dinhmunah Lalhmachhuana Zofa hi Mizo zinga lehkhabu tichhuak hnem ber a ni.