SUPER MARIO: Kar hnih chhung lekin 2023-a film hlawhtling ber a ni nghal!

Computer-animated adventure film, video game behchhana siam "The Super Mario Bros. Movie" chu tlangzarh aṭanga kar hnihnaah pawh a la hlawhtling rem rem hle. Kar liam ta chhung khan North America box office aṭangin USD mtd 87 lakluh belhin, animated movie zinga hlawhtling ber pawl a rawn ni nghal a, kar hnih chhung lekin kumina film hlawhtling berah a rawn inhlangkai nghal der a ni.

Hollywood-a lemchanthiam ṭha rual - Chris Pratt, Anya Taylor-Joy, Charlie Day, Jack Black, Keegan-Michael Key, Seth Rogen, leh Fred Armisen-te'n aw an thawhna 'Super Mario' hi chhungkua pawha en ho tlaka him leh hmuhnawm a ni a, kum 1990 hnulama piangte phei chuan an naupan laiin he game hi an khel deuh furin a rinawm.

Tlangzarh kar aiin entu hi 41% velin an tlahniam a, mahse tlakhniamna ṭha a ni. He film hian khawvel pum aṭangin USD mtd 724.4 a lalut tawh a, kar loah USD tld 1 a lakluh thuai a rinawm hle a ni.

Super Mario hian kumina film sum hailut hnem ber "Ant-Man and the Wasp: Quantumania" lehpelin, tlangzarh aṭanga kar hnihah kumina film sum hailut hnem ber a rawn ni a, video game behchhana film siam zinga sum lalut hnem ber nihna a rawn chelh bawk.

Film thar film thar

Russel Crowe channa, supernatural horror film "The Pope's Exorcist" chuan USD mtd 9.2 lalutin, pakhatna nen an inkar hi a thui hle.

Comedy horror film thar, Count Dracula lema Nicolas Cage channa "Renfield" chu palinaah a rawn inkhuhhawng a, USD mtd 7.8 a lalut. "John Wick Chapter : 4" chuan USD mtd 7.9 lalut lehin top 3-ah a la inhamtang ve bawk.

Khawvela pheikhawk lar ber a nih loh pawha lar ber pawla chhal ngam, Nike Air Jordan indin chhoh dan chanchin Ben Affleck-a kutchhuak "AIR" chuan USD mtd 7.7 lalutin pangana dinhmun a hauh.