Priyanka-i'n sumdawnna/ film-making zir chhunzawm tum

A hmelṭhat leh lemchanthiam vanga India ram mai ni lo, khawthlang ram thleng pawha mite hriat hlawh ni tawh Priyanka Chopra chuan a thlen chinah lungawi mai a la tum lo tih sawiin, kum 40 mi actress chuan entertainment industry chungchang hrechiang lehzual turin business school-ah kal a tum tih a sawi.

"Business school-ah kalin industry hnathawh dan ka belchiang duh a, industry dang hnathawh dan thlengin ka zir chak a ni. Entertainment industry emaw film-making emaw zir zawm ka chak hle," tiin a sawi.

Priyanka hi a tleirawl ṭan aṭangin entertainment huangah hian a inhnamhnawih avangin zirna lama a hma-chhawpte a bawhzui ṭha tawk lo hle a, "School-a kalte hi ka chak takzet a ni. Ka kal ang em chu ka hre lo a, mahse ka thinlung chuan a la chak reng. Kum 17-18 ka nihin eizawnna bul ka ṭan a, ka duh ang pawhin ka zir sang thei ta lo a ni," a ti.

Priyanka chuan tunhnai khan Bollywood-a mi ṭhenkhatte nen inhriatthiam lohna lian tak an neih ṭhin thu a sawichhuak a, "Industry-ah khan nekchepin ka awm. Chhan awm loin film ka chan loh phah a, mi ṭhenkhatte nen inhmuhthiam lohna kan nei a ni. Politics hi ka hne tawh em avangin chawlh ka mamawh a ni," tiin Indian film industry a chhuahsan chhan a sawi chhuak.

Priyanka hian kum 2011 khan US-ah record deal ziakin, he inremna hian a tan America ramah kawng zau tak a inhawn phah thu sawiin, "Rimawi hmangin hun ṭha a lo inherchhuak a, khawvel hmun hranah te kalin, ka movie chan chaknaah ngen ngawih ngawih ngai tawh loin min siam ta a ni," tiin Nick Jonas nupui chuan a sawi.