ASTRO member Moonbin a thi

K-pop star, Moonbin chu Nilaini zan khan a chenna Seoul, South Korea-ah thia chhar a ni.

"April 19 khan, ASTRO member Moonbin chuan min kalsan thut a, vana arsi pakhatah a chang ta. Kan lungngaihna hi an fapa leh unaupa chantu Moonbin a chhungte nen tehkhin rual ni lo mah se, ASTRO member thihna hian min ṭhawngin pawi kan ti hle a, kan sun takzet a ni" tiin ASTRO record label, Fantagio Music chuan an label hnuaia zaithiam an uina thuchhuah an siam.

Kum 25 mi, Moonbin vuina hun hi a ṭhiante, chhungte leh thawhpuiten an hmanpui tur thu an Label chuan a puang. Hetih lai hian, tualchhung police-te chuan K-pop star hi mahni intihlum a nih thu an sawi.

Moonbin hi model leh lemchanthiam a ni a, kum 2016 khan ASTRO hi zawmin, hla hit tak tak "Candy Sugar Pop", "All Night", "Blue Flame" leh "Crazy Sexy Cool"-te chu an larpui hman viau.

Sanha nen sub-group hran dinin, an pahnih hian EP-te pawh an lo tichhuak hman a ni. Moonbin unaupa neihchhun, Moon Sua pawh hi K-pop group Billie member a ni mek a ni.