Moonbin thihnain K-pop a sawi nghing

K-pop star Moonbin thihna chuan khawvel huapa a fans te mak tih a hlawh hle a, he chanchin a darh rual chiaha inhnialna chawkchhuaktu chu zaithiam/performer-te chunga pressure san zia hi a ni.

Kum 25 mi, boy band Astro member -Moonbin hi zaithiam, lemchanthiam leh model a ni a, Astro lama a member pui Sanha nen world tour an neih laia thi a ni. A thihchhan hi chhuichhian mek niin, Moonbin hi mahni intihlum niin police-te chuan an sawi. South Korea entertainment industry-a celebrity zingah hian naupang taka mahni intihlum hi an lo awm nual tawh.

Tun thla tir khan kum 26 mi lemchanthiam, Jung Chae-yull chu a chenna inah thia chhar a ni a, lemchanthiam vek Yoo Joo-eun chu nikum August thla khan kum 27 mi niin a lo boral tawh bawk.

Hei bakah hian, girl group f(x) member hlui, Sulli (25) chu hun rei tak chhung online-a chhaihnawmnah, online bullying a tawh fo avangin a lo intihlum tawh bawk a; a ṭhian hnai tak K-pop star, Goo Hara chu Sulli thih aṭanga thla khat hnu velah a chenna inah thia chhar a ni zui ve bawk. Heng mite hi mahni intihlum anga chhal chu ni vek lo mah se, Moonbin thihna hian Korean show business-ah hlawhtling tura beih a ngaih nasat zia leh, beidawnna khura an tluk luha an nunna thlenina tawrh phah ṭhin dan hian industry kalphung thlak danglam tura ngentu pawh an pung chak hle a ni.

K-pop star ni turin kawng a thui

Milar ni tura competition a san ṭhin zia chu sawilan a ngai tawh lo, South Korea hi developed ram zinga tleirawl mahni intihlum rate sanna ber a ni a, chawhrualin suicide rate hi kumtin tlahniam hret mah se, kum 20 chho vel bawrah a hluar chho leh ṭan hle.

Billboard Magazine tana Asia correspondent, Rob Schwartz sawidanin, North America emaw Europe rama pop star-te aiin South Korea rama celebrity te hian pressure an nei nasa zawk a ni, a ti. "A tir aṭangin inelna hi a sang hle. Korean ṭhangthar zingah eizawnna dang zawng aiin entertainment lama kal tum hi an pung chak ber a ni," a ti. South Korean education ministry-in kum 2021-a primary school zirlai aṭanga zirchianna an neihah, actor, model leh singer nih chu an chak berte zinga mi a ni.

K-pop star ni tur hian, training period hautak tak an paltlang a ngai a, an chhungte leh ṭhianṭhate nen kum tam tak chhung inhmu thei lo leh, inzawmna hloh phah ṭhak khawpin an hun an hmang ṭhin.

Larna piah lam - K-pop side B

Moonbin hi Korean drama series lar tak "Boys Over Flower"-ah khan kum 11 mi lek ni chungin lo inlan tawh mah se, Astro member ni turin kum riat chhung zet training a neih hnuah entertainment khawvelah hian a inlan leh thei ta chauh a ni. A farnu, K-pop girl band 'Billlie' a member Moon Sua chuan K-pop singer ni tura inpuahchahnan hian kum 12 chhung zet training a nei a, hei hian hlawhtling tur chuan talent neih ṭhat piah lamah chhel a ngaih zia te, tei rei peih a ngaih zia a tarlang.

Milar zingah rilru lama harsatna nei, mental health issue nei ten an tuar bik hle. Industry pawhin milar ni chungin phurrit lian tak an tawk thei tih hriain, k-pop star ṭhenkhatte chu an mahni inenkawl turin hun rei tak chawlhte pawh an pe ve ṭhin.

Girl group, Twice member Jeongyeon chuan kum 2020 aṭangin mental health leh hliam vangin break hi vawi li a la tawh a, thla hmasa lawk khan a lo kir a ni. Hetiang bawk hian, kum 2019 - 2020 inkar khan taksa hrisel lohna avangin Moonbin pawhin chawlh lailawk a lo puang ve tawh bawk.

Agency ṭhenkhat chuan trainees leh celebrity-te rilru tihthawvenna atan therapy session an buatsaih sak ṭhin. South Korea-a search engine lian ber - Naver chuan agency chhunga thil fel tawk lo an kalpui dan an hailan hnuah, kum 2020 khan entertainment news bikah comment section chu an lo khar tawh a ni.

Heng karah hian milar ngaihsanna erawh mihring kan nih chhung chuan a thi dawn lo a, K-pop pawh hian an kalphung hi an thlak mai a rinawm loh. "K-pop hian zun mak danglam tak a nei a, fans ruhkawl tak tak te'n an idol-te hi an atchilh tak meuh a, level sang taka awm reng tur pawhin an beisei reng bawk a ni," tiin industry zirchiangtu Schwartz chuan a sawi.