Raghav Chadha leh Parineeti Chopra October-ah innei dawn?

Aam Aadmi Party leader Raghav Chadha leh a kawppui nia an sawi, Indian actress Parineeti Chopra-te chu kumin October thla hian an innei dawn niin India Today chuan a tarlang.

"Parineeti leh Raghav te'n roka an zo tawh a. Chhungkhat laina hnaite nen tluang taka neih niin hun hlimawm tak an hmang a ni. An inneih hmain hmabak ṭul zual tihhmasak phawt an duh avangin, inneih chu hmanhmawh thlakah an ruat lem lo a, kum tawp lam October-ah chuan an inneih ngei hmel a ni," tiin report chuan a sawi.

Raghav Chadha leh Parineeti Chopra-te hian an inkar hi official-in an la puang lo a, mahse an pahniha an chhuak dun lai hi hmuh an ni fo thung. Kumin kumtira Mumbai-a chawhlui an kildun hnuah leh, airport aṭanga an chhuak dun lai an hmuh aṭangin an inkarah rinhlelhna a rawn piang zui ta a ni.

Parineeti hian Amitabh Bachchan, Neena Gupta, Anupam Kher leh Boman Irani-te nen film thar "Uunchai" buaipuiin hun a hmang mek. Kum 2011 khan a film hmasa ber romantic comedy 'Ladies vs Ricky Bahl' aṭangin lemchan khawvelah a tal ṭan a, 'Code Name: Tiranga', 'The Girl On The Train' , leh 'Saina Nehwal biopic'-ah te pawh lo chang tawhin, kum 2013 aṭangin Forbes India's Celebrity 100 ah kumtin a la lang ziah a ni.

Hetih lai hian Punjab aṭanga Rajya Sabha Member of Parliament naupang ber ni thei, Raghav Chadha hi India rama politician lar ber pawl leh AAP member ni lai niin, chartered accountant a practise mek bawk.