Twitter blue tick hloh zingah Beyonce, Ronaldo leh Kim K

Eng nge Beyonce, Cristiona Ronaldo leh Kim Kardashian te nen inanna kan neih kan tih chuan, Twitter-ah keini mi nawlpui ang bawkin verified account an nei ve lo tih hi a ni.

Social media giant chuan kar hmasa Zirtawpni aṭang khan milar sang chuang te chu an blue tick verification a tihtawp sak a, Elon Musk lo sawilawk tawh angin a company-in hlawkna chang tura a hmalakna kal zel a ni.

Twitter hmangtu, blue tick nei duhte chuan kum khat chhungin USD 84 an chawi a ngai ṭhin tawh ang.

Heng hmalakna karah hian, NBA star Lebron James chuan pawisa a chawi loh tur thu a sawi na chungin, Elon duhsakna changin blue tick hi an paihsak lo. Lebron ang bawkin Stephen King leh William Shatner-te pawh a duhsak zingah telin anni pawh hian pawisa chawi loin blue tick hi an la nei.

Elon Musk-a'n a company-a kalphung thar kalpui a tumna hian sawisel a tawk nasa hle a, milar ṭhahnem takin nuihza siamnan an hmang zui bawk. Jason Sudeikis chuan a verification a hloh laiin a lema a channa Ted Lasso erawhin a hloh lo thung!

Twitter hian kum 2009 khan professional baseball player pakhatin a hminga account lem an siam vanga a khin hnuah blue tick hi an kalpui ṭan a, heta ṭang hian blue tick chu khawtlanga an nihna tarlang tu, status symbol, thuneitu leh an chungnunna lantirtu pakhat atan an hmang zui a, hei hi Musk chuan hman ṭangkai tumin 'Twitter-verse' tharah chuan verified account-te chu pawisa chawitir a tum ta a ni.

Verification kalpui a nih hma hian, Kanye West, Shaq leh Ewan McGregor-te chu celebrity zinga rawn ṭawngchhuak hmasa ber niin an kalphung hi ṭha lo an tih thu an sawi. Chhinchhiahna hi paih a nih tak avangin, milar leh an fake account hriat hranna awlsam ber tur chu an follower neih zat aṭanga teh a ni tawh mai hmel. Verification tihtawp a nih hnu lawkah, US senator hlui Hillary Clinton hming leh hmel hmanga account lem lo siamtu pakhat chuan nakuma inthlanna neih turah a din leh tur thu a lo puang hmanhmawh bawk!

Twitter-a verification scheme tharah hian, account an verified dan a zirin gold, grey leh blue badge-ahte ṭhenhran an ni a, mahse chhinchhiahna mumal tak awm lo hian mipui a la tihrilhhai hle.

Social media monitor leh expert-te chuan manchawia verification kalpui chu thuthang dik lo an vawrhdarh phah thei tih sawiin, hei hian advertiser tam tak a hnawtkiang thei a; verification subscription model aṭanga pawisa ṭhahnem tak an lakluh ṭhinte chu an chan thei dawn tih an sawi bawk.

Mahse Musk chuan danglamna siam chu a tirah a harsa ṭhin tih sawiin, "Dinhmun ṭha zawk kan pan mekin ka hria, a tlangpui thuin kan trend hi a ṭha rih hle," tiin an kalphung thar chu ṭha tawk hleah a ngaih thu BBC-in an kawmnaah a sawi.