Science & Environment: Europe-a khawlum lutuk vangin 2022 chhungin mi 15,700 thi

Khawvel puma greenhouse gas inchhek khawl zel vangin khawkheng, tuilian leh khawlum (heatwave) a hluar chho zel a, khawlum lutuk vangin kum 2022 chhungin Europe khawmualpuiah mi 15,700 an thi niin World Meteorological Organisation's (WMO) annual report 2022 chuan a tarlang.

United Nations hnuaia agency, WMO report-in zirchianna an kalpuina aṭangin kum kal ta chhung khan greenhouse gas chi thum - carbon dioxide, methane leh nitrous oxide chu a kumtelin a sang chho zel tih an hmuchhuak.

Khawkheng, tuilian leh, khawlum te hian khawmual tin leh ram tin; a bikin India chu a nghawng nasa hle. Hei vang hian USD tld chuang an chan phah ziah ṭhin tih report chuan a tarlang. Antarctic-a vurte chuan a kiam lai ber a thleng a, Europe-a vur tlang, glacier chu ṭum dang zawng aiin a ral chak a ni, a ti.

Kum 2022 kha kum riat chhunga global mean temperature a san ber ṭum niin, chawhrualin 1.15 degree Celsius chunglam vawi 1850-1900 inkar a kawk a ni.

"Khawvel puma gas emission sang zel vanga sik leh sa inthlak chuan mipui khawsak kawngah harsatna tam tak a siamsak a, a nghawng hi a lian hle a ni. Kum 2022 chhung khan East Africa-a khawkhengte, Pakistan-a ruahtui tlak nasat zia te leh, Europe leh China-a khawlum lutuk te chuan mi maktaduai chuang tan harsatna a thlen a, ei tur lam indaih lohna, an chenna hmun chhuahsan hial ngai te leh, dollar tld chuang hloh phahna te a thlen a ni," tiin WMO Secretary-General Petteri Taalas chuan a sawi.

China chuan chhinchhiah theih china nipui khawlum uchuak tak thlen rei ber ṭum an tawng a, June thla laihawl aṭangin August thla tawp thleng khan 0.5 degree Celsius margin-ah an awm a ni.