Google CEO Sundar Pichai-a'n kum 2022-ah zangnadawmna atan USD mtd 200 chuang hmu

Alphabet Inc Chief Executive, Sundar Pichai chuan kum kalta chhung khan zangnadawmna kaltlangin USD maktaduai 226 a dawng a, a hnathawk dangte hlawh zat chawhrual aiin a let 800 chuangin a tam tih an security filing, Zirtawpni liam taa tihchhuah chuan a tarlang.

Google hnuaia awm, Alphabet chuan khawvel pumah an hnathawk zat hi nasa taka an tihhniam laiin, California-based company, The Mountain View chuan January thla khan hna 12,000 chuang chu tihtawp an tum thu an sawi a, hei hi an hnuaia hnathawk zawng zawng aṭanga chhutin 6% vel a tling.

Tun thla tir khan, Google-a thawkte chuan hnathawkte ban an nih dan chungchangah lungawi lohna lantirin London-a an office-ah an pungkhawm. Hetiang bawk hian, March thla khan Zurich office-ah thawktu 200 chuang ban an nih avangin lungawi lohna an lo lantir tawh bawk a ni.