Khiangte Construction Ṭhazual Lengzem :Sabina Somi'n 'Ruahpui Vanawn' a surtir

Khiangte Construction Ṭhazual Lengzem chart thar berah Sabina Somi hla mawi tak "Ruahpui Vanawn" chu hun rei tak chart-a a cham hnuin pakhatna a rawn ni ta!

Ruahpui Vanawm surtirtu Sabina

Sabina hi mi nawlpui chuan kan la hre tam lo maithei, mahse a zai ngaithla tawhte chuan a zaithiam piah lama a chevel hmuhnawm ṭhinzia kan hmuh hmaih hauh lo ang. Sabina hlasak te hi awm nuam taka min siam thei, feel good factor min pe thei chi a ni tlangpui ṭhin. "Ruahpui Vanawn" pawh hi hmangaihna dinchan tir tlat tura fuihna lam hla a ni bawk. Music Video hmuhnuam tak hi Sabina khawsak mekna United States-ah shooting neih a ni a, rimawi khawvela mikhual lo tak Peka Fanai phuah niin; music pawh hi ama kutchhuak vék a ni. Recording hi Khai-ah neih a ni a, video hi House4nimo kutchhuak a ni thung, a thawhpuite pawh an theuneu lo hle. He hla ngaithla duhtan MDM YouTube Channel-ah engtik lai pawha hmehchhuah mai theihin a awm a ni.

HT Lalthanzami nge Ngurthansanga chungnung zawk dawn?

Chart-a pakhatna nih tuma inum boruak pawh a ngaihnawm chho zel a, chart-a lang phak te hi chu hla mawi tak tak vek an ni. Chart hmasa lama palina HT Lalthanzami 'Nang leh kei' chu pahnihnaah rawn invawrhin, Ngurthansanga pawhin pen hniha hma rawn sawnin a hla thar hmanni lawka a tihchhuah 'Ṭhal awiin Leltepa'n' chu pathumnaah a rawn lang a, a tu nge dingchang dawn hriat a chakawm tawh hle.

Chart a lang dangte

EmEs Hauzel hla, Lalremsanga Hnamte (fam) hlaphuah 'Vang a ni' chu palinaah rawn langin, Lalrinmawia Chawngthu chuan 'Tualchepi Zai' hmangin top 5 a rawn khar.

Anni bakah hian Slickjive, Christina Lalmuanawmi, tunlaia hla hit em em satu Asanga Project ft Ruatpuii, Eddie Pachuau leh PC Lalrinsanga-te chu chart a lang dangte an ni.