Indopui II na hunlai sipai 864 pilpuitu lawng kum 84 hnuah hmuchhuak

Indopui pahnihna hunlaia Japanese merchant ship, Australia sipai 864 chuanna chu kum 84 hnuah South China Sea-a deep-sea survey expert-te'n an hmuchhuak.

Australia defence minister Richard Marles chuan Inrinni khan tan-ina tangte an phurh ṭhinna lawng, SS Montevideo Maru chu July 1942 aṭanga Phillipines tuipui kam aṭanga a bo hnuah Luzon thliarkar hmarthlang lamah hmuh a nih thu a puang.

Australia ram chanchina tuipuia chhiatna rapthlak ber tiha an sawi ṭhin hi Papua New Guinea aṭanga China-a Hainan pana a kal laiin US submarine chuan kapfuhin tuiah hian a pil zui a, kum 84 chhung zet zawn hmuh loha a awm hnuah an hmuchhuak leh thei ta a ni. Chhiatna a thlen lai hian lawngah hian tang an chuan leh chuan loh hriat a ni lo.

Sorkar thuchhuah tarlan danin, marine archaeology leh deep-sea survey specialist-te chuan lawng kehthem hi an zawng a, tuipui feet 13,123-a thukah an hmuh thu sawiin, Australia Defence Department chuan lawng zawn hna hi an pui bawk a ni. He chhiatnaah hian mi 1,000 chuangin nunna an chan a, mitthi zinga a tam zawkte chu prisoners of war leh ram hrang hranga civil mite an ni.