June thlaah Stray Kids an lo let dawn

JYP Entertainment hnuaia din, South Korean boy band Stray Kids fans te tan chanchin lawmawm a ni e.

Stray kids chu June thla tir lam hian album thar nen rawn let leh an tum tih SPOTV chuan a puang a, he thu hi an agency JYP chuan thudik a nih thu rawn nemnghet ve nghalin, "Stray Kids chuan June thlaah comeback an rawn nei dawn a. A rawn let ni tur tak erawh nidangah puanzar a la ni ang," tiin thuchhuah an siam!

Member pariat - Bang Chan, Lee Know, Changbin, Hyunjin, Han, Felix, Seungmin, leh I.N. (kum 2019 khan Woojin-a'n a chhuahsan) awmna hian March thla tir khan an music video thar pawh an peihfel tawh thu hi puangin, April thlaah comeback tumin an inbuatsaih thu an tarlang. Khatihlai khan, JYP Entertainment chuan MV thar chu shooting zawh ni tawh mah se, an rawn kir hun tur erawh an la puanzar theih loh thu a sawi a, hunte an kal leh det a, an rawn comeback hun atan June thla chu nemngheh a ni ta.

Kum 2021 khan, Stray Kids studio album pahnihna 'Noeasy' album chu maktaduai chuang hralhchhuah a ni a, an band tan mellung pawimawh tak an siam. Kum 2022 khan United States-a Republic Records hnuaiah inziaklut lehin, EP pahnih 'Oddinary' leh 'Maxident' chu an tichhuak leh a; US Billboard 200 leh UK Albums Chart-ahte an lanpui ve ve. South Korean boy band ṭhangduang tak hian an album tihchhuah leh tur pawh hi beiseina sang tak nen an thlir ngei a rinawm hle.