Fifa mangṭha? EA Sports FC hmelhriat rawh le

Ṭhianho leh chhungkua, a bikin mipa inkawmhlimna lo ni tawh ṭhin chu Fifa game hi a ni. Kum 30 hnuah EA chuan FIFA nena an thawhdunna an tihtawp hnuin EA Sports FC tiin game hming chu a thlak a, an mahniin an kalhrang dawn a ni.

July thla hma chuan gameplay kimchang puanzar ni dawn lo mah se, Fifa khelṭhinte rilru hmin tuma hmalakna erawh kalpui ṭan a ni der tawh.

An chhut danin, kumtina Fifa game thar khelziah ṭhin mi maktaduai 150 vel an awm niin an sawi. Game logo thar tur hi Premier League ground-a advertising board-ahte tarlan an ni ṭhin a, EA chuan khawvel puma grassroots football project ṭanpuina tur 'FC Futures programme' pawh a lo tlangzarh tawh a ni.

EA Sports FC vice-president David Jackson chuan, "Tun hi thawnthu thar kan siam hun a ni, hmalam hun ṭha kan chher theihna hun ṭha tak a ni bawk," a ti. Eng anga industry lian tan pawh mipui nawlpui hmelhriatsa thlauhthlak hi sumdawnna kawngah nghawng thui tak a nei thei a, a bikin gaming industry-a hming langsar leh brand loyalty ngaih pawimawhna hmunah chuan an dinhmun hi a derthawng thei hle.

Jackson chuan football-a governing body lak aṭangin inla hrang mah se, footballer 19,000, team 700 leh league 30 chu an la awm reng dawn thu leh, Fifa series hmasaa kan hmuh ṭhinte paih chuang si lo in, game hmasa aia changtlung zawk an chhawpchhuak zel dawn tih a sawi.

'Khawvel game'

EA Sports FC hian eng ang chiahin nge gameplay hi an lo siksawi dawn hriatthiam a la harsa a, digital game leh a tak rama thil thleng nen inmil thei tur ang bera an rawn her rem a beiseiawm hle. "Khawvela game khelh hlawh ber angah kan inngai. Hei vang hian, players te leh fans-te kan biak tam a ngai a, khawiah nge an din tih kan hriat hmasak phawt a ngai," tiin Jackson chuan a sawi.

Fifa president Gianni Infantino chuan thla hmasa khan, hun kal zelah EA Sports FC tluk tuma an beih tur thu sawiin, "Fifa game thar, Fifa 25,26,27 leh lo awm zel turte pawh mipa emaw hmeichhe naupang tan pawha e-game ṭha ber a ni zel ang," a ti.

EA hian kum liam ta khan net revenue kaltlangin USD tld 5.5 an lalut a, an hlawhtlinna phena pawimawh tak Fifa nen an thawhdunna a tawp tak avangin harsatna liantham tawk loa an inherrem thei a nih chuan game nuam zawk min chhawpchhuahsak thei dawn em?..I nghak phawt mai teh ang.