Science & Environment : Spanish surgeon te'n khawvela a hmasa ber ni turin khawl hmangin chuap an thlak

Spain rama surgeon rualte chuan khawvela thil la thleng ngai lo chu hlen chhuakin, khawl hmangin hlawhtling takin mihring chuap an thlak!

Barcelona-a Vall d’Hebron University Hospital-a surgeon-te chuan robot kut pali hmang, ‘Da Vinci’ tih hminglem an pek hmangin damlo kum 65 mi, chuap natna hlauhawm tak 'pulmonary fibrosis' nei Xavier-a chuap chu hlawhtling taka an thlak thu an sawi.

Dan naranin, chuap thlak (lung transplant) hi a hautak hle - awmah cm 30 zai kakin nakruh eng emaw zat titliah a ngai bawk a ni. Surgeon-te chuan damlo chuap chu lachhuakin, chuap hrisel nen an thlak leh ṭhin a ni.

Mahse Da Vinci hmangin surgeon-te chuan ruh tihtliah kher ngai tawh loin an awm aṭangin awlsam zawkin a thlak thei dawn a, cm 8 lek zai kakin, chuap chu tisawng chungin khawl hmangin a thlak thei tawh a ni.

Da Vinci robot-te hi American corporation, Intuitive Surgical-in kum 2000-a an siamchhuah kha niin, kum tin damlo ṭhahnem tak enkawlna atan an hmang ṭhin a ni. He khawl hian ama lawng chuan mi a zai thei lo a, surgeon kut zaizir entawnin hna a thawk ṭhin.