BTS Jimin an a tum em avanga surgery vawi 12 ti tawh Canadian actor a thi

Hetiang khawpa khawvel huap zaithiam larte hi chuan ngaisangtu leh, anmahni an tuma an landan entawn pawh mi eng emaw zat an awm dawn tih chu sawi ngai loa thil chiang sa a ni. Mahse, thil reng reng chu a lutuk chin a awm ṭhin thung.

Canada mi lemchanthiam kum 22 mi, Saint Von Colucci pawh hi BTS' (Bangtan Boys) singer Jimin an a tum luatna lama zaipui a tawh hnuah vanduaithlak takin a thi.Colucci hi Pathianni khan South Korea-a damdawi-in pakhatah kumtir lama a inzainaah harsatna tawkin, a natna tuar loin a thi zui ta a ni.

Report tarlan danin, Colucci hian U.S. streaming network pakhatah K-pop star lem a chan theihnan plastic surgery vawi 12 a ti tawh a, a inzaina vang hian USD 2,20,000 chuang a seng tawh niin a tarlang. Inrinni liam ta zan khan nikum November thlaa a khabea implants a vuahtir phawi tura a inentir chu a taksaah infection nasa tak a awm tih an hmuchhuak a, enkawl nghal ni mah se a tukah a boral zui ta a ni.

Publicist, Eric Blake chuan Colucci hian kum 2019 khan Canada chhuahsanin, music industry luhchilh tumin South Korea hi a pan tih a sawi. "A landanah hian a lungawi lo hle a, a khabe leh biangte hi kil li nei ang deuha a lan avangin Asian tam takin an neih, V-shape hmelhmang neih tumin a bei ṭhin," tiin Blake chuan a sawi.

Kum liam ta chhung khan cosmetic procedure vawi 12 lai a nei hman a, chung zingah chuan jaw surgery, implant, face lift, nose job, eye lift, eyebrow lift, lip reduction leh zai tenau eng emaw zat a hmachhawn thu sawiin, jaw implant surgery hlauhawm zia vawi tam kan hrilh chung pawhin a kaltlangpui lui a ni, a ti.

Blake chuan Colucci chu a landanah a lawm lo ṭhin hle tih sawiin, "A hmaifang chu ṭha tawk loah a ngai. A landan avangin South Korea-ah hna hmuh harsa a ti hle a, khawthlang ram hmel a put avangte'n enhran niin a inngai fo ṭhin bawk a ni," a ti.

Colucci hi Korean drama "Pretty Lies" ah pawh a lo inlan tawh a, a changtu pawimawh tak zinga mi a ni nghe nghe.