Evil Dead-in Super Mario a tithlabar zo lo

Khawvela Arcade game hlawhtling berte zinga mi, Super Mario Bros movie chuan hlut a la hlawh hle a, kar thum chhung chu a zawnin North American box office-ah a champion ta!

Nintendo Video Game Franchise hian record eng emaw zat a rawn siam chho mawlh mawlh a, kar thum liam ta vel chauha tlangzarh kha ni mah se, hripui len hnua Animated movie sum hailut hnem ber a ni der tawh.

1 billion dollar club a hnaih

Super Mario hian kar liam ta khan USD mtd 58.2 lakluh belhin, US tualchhung bikah USD mtd 434.3 a lalut tawh a, khawvel puma a sum lakluh nen a sum lakluh tlingkhawm hi USD mtd 871.8 lai a tling tawh a, film hlawhtling tehfung pawimawh tak pakhat 'One billion dollar club' chu a hnaih tawh hle.

Mario hian "Minions: The Rise of Gru" (USD mtd 369.7) lehpelin, Universal kutchhuak zinga animated film sum thawkchhuak hnem ber a ni tawh. Movie pangngai zingah pawh a theuneu lo, "Jurassic World" leh "E.T. The Extraterrestrial" te chiah phak tawh lo a, tuna a trend thlir chuan Mario hian a khum vat a beiseiawm hle.

Evil Dead a hráng tawk lo

Super Mario vung vanglai a ni a, eng film tan pawh thawm rawn neih hat a harsa ang tih a rinthiam theih. Horror movie chuai thei lo, Evil Dead film pangana "Evil Dead Rise" chuan USD mtd 23.5 thawkchhuakin pahnihnaah a rawn lang a, Lily Sullivan leh Alyssa Sutherland channa hian B CinemaScore a hmu phak awrh a ni.

Jake Gyllenhaal leh Dar Salim te'n U.S. Army sergeant leh Afghanistan War veteran role an lakna, Guy Ritchie's The Covenant chu beisei phak lo zingah telin, USD mtd 6.3 chauh lalutin pathumna a ni.