Zorina leh Arini-te hla thar zanin aṭangin a ngaihthlak theih dawn ta

Synod Moderator Rev C Chawnghmingliana chuan vawiin tlai hian Praise On 2016-a pakhatna R Lalrinmawii leh, pahnihna Zorinsanga Sailo hla thar "Thu chauh sawi la" tih chu Moderator Quarters kawtah a phuahtu leh mi tlem azawngte hmaah Pathian hnena hlanna hun a hmang dawn.

Zanin aṭang vek hian Zonet Zawlbuk channel-ah chhuah tum ani a, Youtube lamah pawh thlir turin a awm thuai ang.

He hla phuahtu hi C Lalchhandami (Damtei), AMC Corporator a ni. Damtei testimony hla "Thu chauh sawi la" hi Mathaia 8:5-13 & Luka 7:1-10 behchhana a phuah niin, Covid-19 hripui hlauhawm takin khawvel a tuam lai; September 2020 bawr vela a buatsaih niin, Rom sipai za hotu n Isua hnenah a bawih (a nau) damlo tidam tura a ngenna behchhana a phuah a ni.

A thluk hi Lalzemawia siam a ni a, recording hi HC Recording ah tih ani a, Video hi Milestone Video kutchhuak a ni thung.

"Praise On 2016 zawh hnu ah hmun hrang hrang ah te zaiin inkawm chhunzawn mah ila, trio video bak hi kan la chhuah lo a, a phuahtu min biak remna angin a vawikhat nan Duet video kan siam tur hi a hlu kan ti hle. He hla hi nikum September thla khan tih chhuah tum a ni a, mahse mimal programme neuh neuh avangin kan tum hunah kan chhuah thei lo, mahse tuna kan puitlin thei hi kan lawm hle a, he hla lo ngaithla a lo thlirtute tan malsawmna ni ngei se kan ti hle," tiin

Zorina chuan hun rei tak hnuah he hla an puitlin thei chu a lawm thu a sawi.