Down Syndrome Barbie thar tlangzarh

Barbie chuan an product range zauh zel nan Down syndrome doll chu a vawi khatna atan an tlangzarh leh ta.

He doll thar hi Mattel Barbie Fashio-nistas line-a mi niin, naupangte hnenah mawina(beauty) hian landan hrang hrang a nei tih entir an tumna a ni. Taksa lama rualbanloten thliar hranna an tawh ṭhinnate umkiang tura an hmalakna pakhat a nih thu an sawi.

Mattel (MAT) Barbie doll thar ber siamchhuak tur hian National Down Syndrome Society nen an thawkdun a, Down syndrome natna nei ang thei turin an pianhmang, landan, inthuamna, tlereuh leh tuammawina(package) thlengin uluk takin naute lem landantur hi an duang a ni.

Kum 1959-a tlangzarh a nih aṭang khan Barbie doll-te hi hun eng emaw chen chu vun ngo, cher sang leh sam buang, kawng bawr fek tak, awmbawr lianṭha leh high heels sang tak buntir an ni ṭhin a. Kum 2016 khan Barbie sales a tlakhniam avangin Mattel chuan Barbie chu mihring pangngai landan mil zawkin an design chu an rawn tidanglam ta a ni.

Barbie design tharah hian pianhmang chi li leh vun rawng (skin tone) chi sarih, mit rawng chi 22 leh hairstyle chi 24 hmangin naute lem thar hi siam belh an ni.