FIFTY FIFTY leh Warner Records te'n inremna ziak

Girl group lar chak tak, kum 2022-a indin ṭan FIFTY FIFTY chuan an hla hit “Cupid” hmangin khawvel ram hrang hrang chart-a an hming an chher chhoh mek laiin, U.S. label leh Warner Music Group’s Korean subsidiary-te chuan an huang zauh zel turin Thawhlehni khan thawkdun turin inremna an ziak.

FIFTY FIFTY agency ATTRAKT chuan, "Warner Records nen thawhdunna hun ṭha kan nei tur hi kan lawm hle a, music industry-ah FIFTY FIFTY hmasawnna tur leh ke an pen zel dan tur kan ngaihtuah ho ang. Kan hmathlir leh suangtuahna ang pu ve kan thawhpui thei hi kan lawm hle a, anni nen hian hlawhtlinna tam tak kan chharchhuah ngei kan beisei tlat a ni," tiin thuchhuah an siam.

FIFTY FIFTY pawhin pawl anga thuchhuah rawn siam ve nghalin, "Warner Records nen kan thawkho thei hi kan tan chuan chawimawina sang tak a ni a, kan hma hunah eng nge kan tawn dawn tih hre chakin, phurnain kan khat tawh a ni. Khawvel huapa kan fans-te hnenah music ṭha tak leh content ṭha zawk rawn chhawpchhuah zel kan tum e," tiin Saena, Aran, Keena, leh Sio awmna chuan an sawi.

Warner Records tarlan danin, “Cupid,” English-language “Twin Version,” leh a instrumental version hian global stream mtd 377 a nei tling tawh. Billboard Hot 100-ah K-pop group zinga debut hlawhtling ber an nih hnuin, 'Cupid' hian a vawi khatnan tunkar khan top 50 huang a rawn daikai tawh bawk a ni.