Billboard Latin Woman of the Year hmasa ber - Shakira

Colombian singer Shakira chu Billboard ‘Latin women of the year’ award hmasa ber dawng tura thlan a ni.

Billboard chuan an official Instagram page kaltlangin an puang a, "Global superstar Shakira chu BBMujeresLatinas show hmasa berah Billboard Woman of the Year dawng tura thlan a ni," tiin an ziak.

Watsco Center, Miami-ah May 6 hian kum 46 mi zaithiam hnenah he chawimawina hi hlan a ni ang. Darkar hnih chuang awh tur, music special event hi Ivy Queen leh Jacqueline Bracamontes tn an kaihruai dawn a ni.

Shakira hian khawvel pumah record maktaduai 95 chuang a hralh tawh a, Latin hmeichhia zingah a ni aia record hralh hnem an la awm lo.

Kum 18 mi lek a nih laiin Pies Descalzos Foundation a din a, USD mtd 40 chuang thawkchhuak tawhin, naupang 1,50,000 leh chhungkua nuai 9 dawnin a rah an seng tawh a ni.

Tun thla tir khan footballer Gerard Pique nen an inṭhen hnuah Shakira chuan a fate nen Barcelona, Spain an chhuahsan tur thu sawiin, a hnu lawkah social media kaltlangin Pique nena an dinhmunte pawh a puang zui bawk.

Latin lalnu

Shakira hi kum 30 chuang rimawi khawvelah hian a lo tal tawh a, zaithiam danglam bik a nihzia inhrilh nawn a ngai awm lo e. A hla hit heng - ‘Hips don’t lie’, ‘Can’t remember to forget you’, ‘Loca’, ‘Whenever Wherever’, ‘Waka Waka’, ‘Beautiful Liar’, ‘She Wolf’, te chu a hlawhtlinpui hle a, hei vang hian mi tam tak chuan Latin rimawi lalnu, ‘Queen of Latin Music’ tihte'n an hmehbel fo a ni.