Bolero Maxx Pikup tlangzarh a ni ta

Mana Motors, Mahindra Full Range Dealer chuan Thawhlehni tlai khan an showroom, Bawngkawnah Zoram mipui lei theih turin pikup chhuak thar, Bolero Maxx Pikup an tlangzarh.

Pikup stand hruaitute leh Mana Motors hotuten khuh hawngin an bel chiang nghal a, tlang ram kawng chhiaa tlan tura rin tlak leh sumdawngte tan ṭangkai tak a nih ngei an beisei.

Mana Motors general manager, Ramnghahmawia Ralte chuan, "He pikup chhuak thar hian M2di engine 2523 cc a hmang a, driver bulah passenger pahnih an ṭhu thei bawk. 80 bhp leh 220nm torque a nei a, a body sei zawng feet 10 leh a zau zawng feet 5.9 laia zau a nih avangin kg 2000 chu hnehsawh taka phur thei tura duan a ni," a ti.

Imaxx technology a rawn ken tel avangin app hmangin a neituten mobile phone aṭangin a awmna leh a tlan dan zawng zawng an en vek thei a, pikup segment-ah hetiang thiamna hmang hmasa ber a ni.

A man tlawm ber Rs 7,80,000-in a lei theih a, mi 10 velin an hauh lawk tawh niin Mana Motors chuan an sawi.