Kim Kardashian Look-Alike Christina Ashten Gourkani a thi

Reality TV star, Kim Kardashian hmaifang leh pianzia ang tak a neih avanga social media lama mi lar, Christina Ashten Gourkani chu kum 34 mi niin a thi a, report chuan plastic surgery procedure kalsual nghawng zel vanga thi niin a tarlang.

Christina thih thu hi a chhungte chuan GoFundMe campaign kaltlangin an puang a, damdawia inenkawlna fuh tawk loh vangin model hi cardiac arrest vangin a thi ta a ni, an ti.

Report chuan, Gourkani hian surgery vawi tam tak a tih bakah, fillers, Botox leh cosmetic procedure dang eng emaw zat a tih ṭhin thu a tarlang a ni. "Ka tleirawl chhoh aṭangin, Kim Kardashian nen kan inan thu vawi tam min hrilh ṭhin a ni," tiin Gourkani chuan a sawi hial.

Gourkani chhungte chuan damdawi-ina a inenkawlna senso phuhrukna atan pawisa an khawn a, nimin thleng khan USD 5,000 dawn an hmu tawh a ni.