Zaninah PineHill kan en thei dawn ta

Mizo film thar leh dangdai, PineHill chu zanin dar 8 aṭangin Lersia Play-ah mipuite lei theih tura chhawpchhuah a ni dawn ta.

Champhaia Zosiam Two Wheeler dawr fak tura chah chhoh, model Kimkimi leh a naute chuan shooting an neihna tur hmun bula in hlui, sak dan dangdai leh nuam zet mai chu hotel aiin an thlang a, chumi hmunah chuan diary an hmuchhuak hlawl mai. Diary chhunga thu inziak aṭang chuan Zothansangi, a nutei te ina awm, Champhai College zirlai inawkhlum ta khawvel-ah kan lut ho dawn a ni.

Mizo film tam ber hi a changtupa leh changtunu vanga enchak hlawh leh hmuhnawm an ni fo ṭhin a, PineHill erawh a danglam tlat. Misualpa hi in en hma aṭangin lo chhinchhiah bik rawh u, a en tawhte mit la bertu a ni a, ngei tak tak hlawh phak hial khawpa a role changchhuak hnehsawh thiam a ni.

Women and child development department, Mizoramin sponsor tlaka a ngaih, PineHill hi Apil 25 zan khan minister Er Lalrinawma'n a lo release tawh a, hemi ṭum hian sawm bik mi tlemte nen enho a lo ni tawh.

RamBoss kutchhuak:

PineHill en tichakawmtu ber pakhat chu, Triautrackx aṭanga kan hriat lar, an hlaphuahtu leh music producer RamBossa tia hriat ṭhan; script ziah a ni tlat hi a ni. "Literature student ka ni a, hemi huang chhungah bik chuan poetry leh hla phuah aiin drama lam hi ka tuipui a, keimah rau rauah thiam ka inti zawk," tiin RamBoss chuan Vanglaini a hrilh. A thiam zawk takzet em tih hi a en tichakawmtu a ni bawk.

He movie hi Champhai Pinehill hmunah shoot a ni. Director hi F. Lalthenloa, Champhai Vengsang a ni a, Director of Videography hi Lalmuanzoa (Gabriel Graphix) niin a score hi Lalramsanga Khualsim khawih a ni ve thung.

Zanin dar 8-ah Lersia Play aṭangin lei theih a ni dawn ta a, a man hi Rs 128, Rs 149, Rs 179 leh Rs 249 te a ni.