US TV show thlak danglamtu zinga mi Jerry Springer a thi

America rama tabloid talk show lar tak ni ṭhin, The Jerry Springer Show bulṭantu leh, show presenter ni nghal Jerry Springer chu Thawhlehni khan kum 79 mi niin a chenna Chicago-ah a thi.

The Jerry Springer Show hi September 30, 1991 aṭanga July 26, 2018 inkara pekchhuah ṭhin niin, he show-ah hian nupa leh kawppui inkara inbumna lamte tarlan ṭhin a ni a, show en ṭhinte chuan boruak a sosan ṭhin zia an hre ngei ang. He show lar tak hi a hunlai kha chuan US mai ni lo, khawvel huapa show ngaihven a tling phak a ni.

Springer thupuangtu Jene Galvin chuan Jerry mizia sawiin, "Jerry hian mipui hip theihna mak danglam tak a nei a, hei hi a hlawhtlinna hriltu lian tak a ni. Politics, broadcasting, mi fiam leh kawm a thiam em em a, tu pawhin thlalakpuiah emaw titi puiah sawm se a hnar ngai lo," tiin TV show host hming dai tawh tawh lo tur nihna a sawi.

Springer hi Robert F Kennedy adviser-ahte ṭangin, kum 1977-78 inkarah Cincinnati Mayor hna chelh tura thlan tlin a nih hnuah, Ohio governor inchuha a hlawhchham zui tak hnuah TV journalism a luhchilh a, khawvel hmelhriat a rawn ni chho ṭan.

The Jerry Springer Show hi kum 1991 aṭanga pekchhuak ṭan niin, khawtlang buaina te leh, US politics chungchang thlurbing ṭhin a ni. Mahse hei hian mipui a hip tawk lo tih hriain, entu an tama ratings boost nan mipat hmeichhiatna lam leh, content uchuak ang reng tak tak an pechhuak ṭan a, heta ṭang hian US-a show ngaihven hlawh ber pawl a rawn ni chho zui a ni.

Kum 1990 tawp lamah phei chuan Oprah lehpelin, US-a daytime television ratings hmu sang ber nihna te a hauh hman hial. Mahse kum 2018 khan entu an tlakhniam tak zel avangin show hi tihtawp a ni.

Kum 2003 khan he TV series behchhanin 'Jerry Springer: The Opera' buatsaih niin, show 600 chuang tihchhuah a ni a, Olivier awards pali lai a dawn phah nghe nghe.

Kum 2007-2008 inkarah America's Got Talent show host lehin, TV show hrang hrangahte a inlan kual a, nikum December thla khan kum riat lai a lo kalpui tawh The Jerry Springer Podcast chu taksa hrisel lohna avangin a chawlhsan tih a puang.

Nikum October thla khan 'The Masked Singer'-ah inlanin, hei hi mipui hmaa a inlanna hnuhnung ber zinga mi a ni ta a ni.