Ka fanu relna ṭawngkamte hian min tina - Priyanka Chopra Jonas

Priyanka Chopra Jonas chuan a fanu chu hliahkhuh a tum viau niin a lang a, a fanu chanchin rel (gossip) zawnga an ṭawngkam hman ṭhinte chuan a rilru a tinat takzet ṭhin thu a sawichhuak.

Kum 40 mi, lemchanthiam hian a pasal Nick Jonas nen thla 15 mi, Malti Marie nei mekin, a fa hmasa ber 'surrogate' hmanga a neih fiamthu thawnnan an hmang ṭhinte chu hrehawm a tih ṭhin thu a sawiin, "Miin ka chanchin an sawi hian ka tim ru tlat zel, mahse ka fanu chanchin erawhin min tina tlat thung a ni. Ka rilru chuan 'He thilah hian hnuklut ve suh u' ka ti ṭhin. Ka fanu hian mi a rel ve ngai dawn lo asin," tiin, medical lam aṭang thlirin surrogate chu fa a neih theihna sang ber a nih thu Bella Magazine-in an kawmnaah a sawi.

Priyanka hian science fiction action thriller television series, 'Citadel' changin hun a hmang mek a, hmeichhia kum lama la naupang vun ngo ni lem lo te pawh Hollywood star nih tuma bei zel turin a chah nghal bawk. Priyanka chuan mi ngo leh India ram mipui tana kawng hawngtu a nih zel theih a beisei thu sawiin, "Hmeichhia thlah lo kal zel turte tan kawng hawngtu ka nih ngei ka beisei. Hollywood-ah hian Indian emaw South Indian mi emaw kan hmuh chhoh zel ka beisei bawk. Khawvel dawhsana din ve hi kan phu a ni," a ti.

Priyanka chuan Malti chu a pian hun tur aia thla thuma hmaa a pian thu leh, Nick nen chan mai an hlawhthawn thute sawiin, "In zaina room-a ka awm ve a, a te em em a, ka kut ai pawh hian a te zawk hial... intensive-care nurse thiltih ka hmu a, Pathian hnathawh ang an thawk ni berin ka hmu," tiin thi mai theia Malti a awm hnua tun thlenga a damchhanah damdawi thiam te chu a fak hle a ni.