Pa nih chu ka duh lutuk, mahse India danin a phal tlat lo - Salman Khan

Indian lemchanthiam chuai thei lo, Salman Khan pawh a kum a lo upa chho ve ta zel a, kum 57 lai ni tawha nupui a nei lo chu a inchhir chho mek niin a lang a, pa nih a chak thu a sawichhuak.

Salman Khan chuan ṭum khat lai phei chuan fa neih a chak thu sawiin, mahse India danpui vangin ka neih theih loh phah a ni, a ti.

Khan-a farnu, Arpita Khan hian fa pahnih - Ayat Sharma leh Ahil Sharma a nei a, a farnu upa zawk Alvira Khan pawhin fa pahnih dang - Alizeh Agnihotri leh Ayaan Agnihotri neiin, a unaupa Sohail leh Arbaaz pawhin fapa an nei tawh a, Salman chuan a pianpui unau fate nen hun an hmang lai hi a tilang fo a ni.

Aap ki Adalat TV show-a an kawmnaah, Salman chuan "Fa neih hi ka chak ṭhin hle, Mahse India rama kan dante avangin a theih miau lo a ni. Eng nge kan tih theih kan en zel ang chu," a ti.

Salman hian a ṭhian hnai tak, filmmaker Karan Johar pawhin fa pahnih a neih tawh chungchangte sawilangin, "Naupangte hi ka lawm hle. Mahse fa nei tur chuan nu an tel ve a ngai. An tan chuan nu neih chu a ṭha lutuk , mahse nu tam tak kan nei tawh. District pum, khaw pumah kan nei. Anni hian an lo enkawl thei a, mahse ka fa hringtu chu ka nupui a ni ngei tur a ni," a ti thung.

Tun hnaiah Salman hi action entertainer film 'Kisi Ka Bhai Kisi Ki Jaan'-ah inlanin, Pooja Hegde, Shehnaaz Gill, Palak Tiwari, Sidharth Nigam, Venkatesh Daggubati, Bhumika Chawla, Raghav Juyal leh Jassie Gill-te ho nen an chang a ni.

Hei bakah hian, a kawppui hlui Katrina Kaif nen an channa, action thriller film 'Tiger 3'-ah an chang dun leh dawn a, nakkum Diwali hunpui bawr velah tlangzarh tura buaipui mek a ni.