Khiangte Construction Ṭhazual Gospel: Christina Vanlalnghaki "A rintlak si a" a chungnung ber

Khiangte Construction Ṭhazual Gospel chart thar berah Christina Vanlalnghaki chuan "A rintlak si a" hmangin chart chung ber rawn luahin, tluk zo an awm lo.

A chung berah Christina

Christina hi tunlaia gospel band ṭha ber leh active ber te zinga mi, One In Christ aṭangin a hming a rawn chher ṭan a, pawl anga ṭhahnemngai taka a in hman rual hian mimalin gospel hla ṭha tak tak, heng - 'Thlan loh Khawvel', 'Lalpa ṭhatna' leh 'Saltang Zalenna' te pawh a lo tichhuak tawh a, a hlate hi a hlawhtlinpui viau zel a ni.

Christina hla thar ber 'A rintlak si a' hi March 2, 2023-a tihchhuah niin Synod Choir member Kaka Bena phuah a ni. Music hi Drew Records-ah neih a ni a, Studio A-16 chuan mawi takin recording an tihsak a, videography lama theuneu lo tak BS Pictures chuan MV mawi tak min chhawpchhuah sak thung.

Top 3-ah Puipuia leh Angaihi

Kum naupangte ni chunga Mizo Idol top 5 lai inhlangkai thei, Thawhlehnaniropuia (Puipuia) chuan Rosangliana (Zorock) hla phuah 'Thlarau rose par' chu pahnihnaah a rawn lanpui. Pathumnaah hian Mizo Idol aṭang veka kan hriat lar, Angaihi Fanai pawhin zaithiam hming dai tawh lo tur Vanlalsailova hla 'I lamah a ṭang Lalpa' a cover-na chu rawn lanpui bawkin, chart thar leha pakhatna ni tur hi rinthiam a harsa chho hle.

Tute nge lo lang?

Ruth G 'Nitin Lalpa' chuan hma rawn sawn zelin parukna aṭangin palinaah a rawn inhlangkai a, One in Christ pawhin pen hniha hma rawn sawnin an hla thar ber 'Min ngaithla la' hmangin top 5 huang an rawn daikai ta. Seraphic Choir, Vanlalneihpuii, H. Lalruatpari, Stacy VL Muanpuii leh Omomi Khiangte-te chu Ṭhazual top chart a lang dang te an ni.