Trademark chungchanga inbeihnaah Katy Perry-i'n fashion designer Katie Perry lakah thiam loh chang
Pop singer Katy Perry chuan kum 15 chhung zet an lo buaipui tawh trademark battle chungchangah Sydney-a clothing designer, Katie Perry lakah thiam loh a chang.
Khawvel huap zaithiam lar leh Australian designer pakhat inbeihna hi "Davida leh Goliatha" inbeihna angte pawhin khaikhin a lo ni fo ṭhin a, a tawpah chuan Goliatha (Katy Perry) zawk a tlawm ta a ni.
Federal court judge, Brigitte Markovic chuan "Teenage Dream" singer hian Katie clothing business siam chu a bawhchhia tiin Zirtawpni liam taa court document tihchhuahah a tarlang.
Sydney nula, Katie Perry hian kum 2019 khan lawsuit hi thehlutin, zaithiam hian kum 2014 leh 2018 inkara Australia-a tour a neih laiin a trademark neihsa chu pawisa loin a merchandise zawrhchhuahna atan a hmang tiin thubuai hi a thehlut a ni.
He trademark battle hi kum 15 vel zet kalpui a ni tawh a, Katie chuan pop singer hian a trademark a register loh nan theihtawp a chhuah a ni, a ti.
Clothing designer Katie Perry hian kum 2008 khan a brand hming hi a register-a, hemi hma kum chiah aṭang vekin a ma hming vekin thawmhnaw a hralhchhuak ṭan a ni. Hemi kumah tho hian Katy chuan a hla hit "I Kissed a Girl' a rawn tichhuak ve bawk.
"Ka tana bei ka ni mai lo a, he rama sumdawnna te tham tak takte tan pawh ka bei tel a, chung zinga a tam zawk chu hmeichhe dinte an ni. Heng hmeichhiate hian anmahni aia thiltithei leh sum ngah zawkte an beihlet ngam ve na tura bei ka ni tel bawk," tiin designer Katie chuan a sawi.
Judge Markovic chuan zaithiam Katy chu social media kaltlangin, designer trademark hmang hian hoodie, sweatpant, T-shirt leh item dang eng emaw zat thehlarna a hmang tih a puang a, mahse kum 2018 tour-ah erawh a hmang lo tiin BBC chuan a tarlang.
Katy Perry-i'n dan a bawhchhiat avanga a pawisa chawi tur zat hi kumin kumtawp lamah puanzar a ni dawn a, hetihlai hian May 7-a King Charles III lallukhum khumtirna hun, coronation-a zai tur zingah a tel a ni. Katy Perry aiawhtute chuan court thutluknaah hian thuchhuah engmah an la nei lo.