Kum khata Fashion Event lian ber Met Gala 2023

Kum khat chhunga fashion event lian, ngaihhlut leh entertainment khawvel mit fukna ber–Met Gala chu Thawhṭanni zan khan New York khawpuia Metropolitan Museum of Art, Costume Institute -ah neih a ni.

"Fashion's biggest night" an tihah hian fashion, film, television, music, theater, business, sports, social media, leh politics lama mi langsarte sawm an ni ṭhin a, fashion magazine lar Vogue bultuma huaihawt a ni. Kum 1948 khan fashion publicist Eleanor Lambert chuan Costume Institute sum thawhchhuahna atan a huaihawt ṭan a, he fashion event hi kumtin May thlaa Thawhṭanni hmasa berah an hmang ṭhin.

Fashion Icon famta Karl Lagerfeld hriatrengna

Kumin Met Gala-ah hian kum 2019-a fashion icon famta Karl Lagerfeld a pualin, "Karl Lagerfeld: A Line of Beauty" theme hman a ni. Kum dang ang bawkin milarte chuan mipui mit la thei tur ang berin an rawn inthuam a, tlereuh leh mak sak tak taka rawn inlan ṭhinte pawh an kat nuk mai. Kum eng emaw zat chhung chu Lagerfeld hi khawvel huap fashion house lian–Chanel leh Fendi tana mi pawimawh leh khaidingtu pakhat a ni.

Tennis player chawlta Roger Federer, Grammy winner Dua Lipa, lemchanthiam Penélope Cruz leh writer, actor leh producer Michaela Coel-te chu co-chair tura sawm an ni.

Milar dang pahnih–Karlie Kloss leh Serena Williams-te pawhin he zan chhinchhiah tlak tak hi fa an pai thu puanna hun remchang atan an hmang zui bawk.

Ticket man nuai 40 chuang!

Met Gala 2023 ticket pakhat man hi USD 50,000 (Rs nuai 40 chuang) man a ni a, table chang pha chin tan USD 3,00,000 (Rs vbc 2.5) vel an sen a ngai thung a ni. Heng sum lutte hi Metropolitan Museum of Art hnuaia Costume Institute puala hman ṭhin niin, chawhrualin mi 400 vel tel ziah anga chhut an ni.

Milarte'n an thawmhnawm manah eng zat nge an sen ṭhin?

Kumtina mipui mit fukna ni ziah ṭhin chu milarte thuam inbel leh an thawmhnaw man zat hi a ni ṭhin. Nikum khan Kim Kardashian chuan fashion icon turu Marilyn Monroe-i hak hnu rhinestone-studded dress USD maktaduai 4.8 man a rawn ha.

Kumina an dress man hi chiang taka tarlan a la awm lo nachungin, ṭhenkhat hi chu a hmel en ringawt pawha USD mtd chuang man tih chiang ngawih ngawihte an ni.

Supermodel, Gigi Hadid chuan Givenchy outfit rawn hain, he kawr siamnan hian darkar 300 chuang tehmeuh hun an hmang. Hetih lai hian, Kendall Jenner erawh Marc Jacobs boot leh leotard ban tlawn rawn hain fashion designer hriatrengnan white collar a rawng hreng bawk.

India aṭangin Priyanka leh Alia Bhatt

Alia Bhatt pawh a vawi khatnan Met Gala-ah Prabal Gurung design, Channel bridal look Claudie Schiffer-i'n kum 1992-a a lo hak tawh behchhana siam, pearl nuai 1 chuang hmanga cheimawi a rawn ha. Citadel tv series hlawhtlinna tem mek Priyanka Chopra leh a pasal Nick Jonas te pawh red carpet-ah hian rawn inlanin, Valentino thuam mawi tak an rawn inbel ve ve a ni.

Met Gala veteran Blake Lively tel lohna

Met Gala lalnu tiha an sawi hial khawpa fashion huanga mi bik, Blake Lively hmel erawh kan hmu ta lo a, Gossip Girl actor chuan in lam aṭangin uluk takin Red Carpet a lo thlithlai zawk tur thu a sawi.

Blake leh a pasal Ryan chuan kumin February thla khan an fa palina an nei a, James (8), Inez (6) leh Betty (3) te nu chuan fa pali lai nei tur chuan mi phutkhat ve tak in nih a ngai ang tiin fiamthu thawhnan a in hmang zui a ni.