Thla 9 hnuah Kim K leh Pete Davidson

Kim Kardashian leh Pete Davidson te chu nikum August thlaa an inkar an tihtawp hnuah Thawhṭanni khan Met Gala-ah an intawng leh a, tun ṭuma an intawn dan erawh a dang ta!

Nikum khan an pahnih hian Met Gala red carpet an zawh dun a, Kim chuan Marilyn Monroe gown hmingthang tak rawn ha in, Pete hian a hnung a rawn dawl a ni. An inṭhen hnu hian, kum 42 mi Kim leh kum 29 mi Pete hi an inhaw zui chiam lo niin a lang a, Usher nen an pathum hian kumin Met Gala-ah an inkawmho leh a ni.

Kim leh Pete-te hi “Saturday Night Live” aṭangin an inkar hi a dik chho ṭan a, thla kaw chhung an inzui hnuah August 2022 khan "Ṭhian satliah nih kan thlang ta zawk" tiin an inṭhen thu hi an puang.

"Hmangaihna leh inzahtawnna sang tak an inneihsak tawn a, mahse, kar hlaa awm an nih avangte leh an hnathawh dan a inmil chiah loh avangin an inngaihzawnna hi kalpui reng harsa an ti a ni," tiin thudawnna chuan an inṭhen chhan a tarlang. Hei bakah hian, kum lama an inthlauhna pawh hmehbel theih a ni bawk. "Kim hian fa pali a nei tawh a, a fate enkawl ringawt pawh hautak tham tak tur a ni. A rilru leh ngaihtuahna tam zawk chu a fate chungah a tla lo thei lo a ni.' a ti

Pete hi tunah chuan “Bodies Bodies Bodies” co-star, Chase Sui Wonders nen an inzui mek a, Met Gala-ah erawh hmuh a ni lo thung. Kim erawh an inṭhen hun hian dating scene lamah a la inhnamhnawih leh ta lo a ni.