Super Mario ropuina dang zo an awm lo: USD tld 1 lalut tling dèr!

"The Super Mario Bros. Movie" chu tlangzarh aṭanga ni 28 hnuah pawh box office-ah tluktu an la awm lo a, he CGI animated movie hian kar li chhung chu chart thunun tawhin, kar liam ta khan USD maktaduai 40 lalutin a chungnung leh ber.

Nintendo's video game franchise hian US bikah USD mtd 490 lalut tawhin, khawvel puma a sum lakluh hi belhkhawmin USD tld 1.03 lai a tling tawh. Hemi aṭang hian Mario huhang neih len zia hi sawi nep theih a ni hauh lo mai le.

Mellung pawimawh a siam zel

Mario hian mellung pawimawh tak tak rawn siam chho mawlh mawlhin, animated movie zinga USD tld chuang lalut thei film 10-na chiah a nih bakah, Covid-19 hripui len hnua animated movie zinga USD tld chuang hailut thei film hmasa ber a ni bawk.

Universal kutchhuak zinga film sum hailuh tam lamah pasarihna dinhmun a hauh mek a, "Jurassic World: Dominion" leh "Despicable Me" chu kar loah awlsam takin a lehpel nghal mai a ni.

Box office-ah hmel ngái an tam

Kar hmasa lama pahnihna "Evil Dead Rise" chuan a dinhmun ngai chelh chhunzawm lehin, USD mtd 12.2 a lakluh belh a, "Are You There God? It's Me, Margaret." chuan beisei angin thawm a nei lian tawk lo a, pathumnaah a lungawi a ṭul.

John Wick film franchise hnuhnung ber tur nia an sawi, "John Wick: Chapter 4" chuan USD mtd 5.8 lalutin palinaah a la inhamtang a, film hming dai tawh lo tur "Star Wars: Episode VI - Return of the Jedi" re-release chu theatre 500 vel lekah pekchhuah ni mah se, USD mtd 4.7 lai lalut thoin, panganaah a awm.

Kar lehah Guardians of the Galaxy Vol. 3

Christ Pratt chuan Super Mario-ah hlawhtlinna a chan mek karah, a film hit leh kumin film chhuak tur zinga en bik hlawh tur "Guardians of the Galaxy Vol. 3" chuan summer movie calendar a rawn pet hawng dawn a, chart hi nasa takin a inthlak pawhin a mak lo ang.