Musician lâr PB Lianhminga a kal ta

Mizo zinga musician thawhhlawk tak PB Lianhmingthanga, Dawrpui Vengthar chu nimin, April 3, 2023 khan hun rei tak natna a tawrh hnuah a boral a, nimin vek khan vui liam a ni.

Mizo band hlun leh lar, Albatross keyboardist PB Lianhminga hi rimawi chhungkuaa sei lian a ni a; a u hi zaithiam lar Rebecca Saimawii a nih bakah a nau PB Liansangzuala (Dreamhunter) hi Mizorama bassist ṭha zinga chhiar tel ngam a ni a, an unaua naupang ber PB Lianmawia (Atea), Boomarang hi India ramin a hriat khawpa zai thiam leh rimawia thawh hlawk a ni bawk.

PB Lianhminga hi keyboard thiam em em mai, sequencing thiam, music track siam lamah phei chuan Mizo zingah ani aia thiam an awm chuang lo ang tih mai tur a ni. Tun hma deuha Mizo zaithiam larte music track kha chu PB Lianhminga kut chhuak deuh vek hi an ni.

A hla phuah zingah Pathian hla ṭha tak pawh telin an band Albatross sak ‘I ropui nan’ tih leh Hlutei hla lar ‘I lainatna’ tihte hi mipui hriat hlawh pawl a ni ang.

PB Lianhminga hi live music-ah a thiamzia a lang chiang an ti ṭhin a, hei vang hi a ni ang beat contest hrang hrangah lawmman a dawn tawh bakah amah pawh intihsiakna hrang hrangah endiktua sawm hlawh tak a ni.

Rimawi lam mai ni lo infiamna lamah pawh mi langsar tak a ni a, badminton leh volleyball-ah a hming a chher hle a, football-ah pawh hnuhma ṭha tak a hnutchhiah bawk.