Youngfella Ft. Smiley 'Thiamthu' a chhuak ta

Tunlaia Zoram Rimawi Khawvel luahtu lian tak, inkawp fuh em em Youngfella leh Smiley te chuan an hla thar 'Thiamthu' an tichhuak ta.

He hla hian a phenah chanchin ngaihnawm tak a nei a, anmahni thil tawn ni lo mah se a phuahtirtu hian a nun kehchhia puangchhuakin Youngfella leh Smiley te hian hla mawi takah an lo chantir a ni.

He hla hi Hip-Hop huangchhung ah awm mah se, a music hian retro 80’s synth pop kan tih ang chi a pawl mah. Hla phuah thiam an nih zia a hriat a, chord progression simple tak si chhungah hla thluk beng fah leh kal kual mawi tak, a thluk nen a in chawih em em hla thu mawi leh runthlak kan hre leh ta. He hla hi an Youtube Channel a dah an rilruk a, mahse an Channel in buaina a tawk a, Darbu lamah Rs. 15 a lei theihin an dah.

Darbu hian theihtawp chhuah puiin he hla phalna nei loa lo tichhuak chu dan anga chhuia hrem zel an tum thu kan dawng. Tunah hian a hla pumpui ni loa Youtube a lo dah an awm thu leh, artist hriatpuinaa dan anga chhui chhuaha hremna pek zel an tum . A hmaa hla ti leak out tute pawh Mizoram Police Cyber Crime Branch nen ṭangkawp a case kal lai mek a awm thu an sawi bawk.