Morgan Wallen chungnunna khawvelah kan cheng mek

Khawvela music chart ngaihhlut hlawh ber pawl, Billboard chart chu Morgan Wallen-a'n a thunun mek a, chart pawimawh pahnih Hot 100 leh 200 album chart chu kar hmasa ang bawkin a thunun leh ta.

Morgan Wallen's "One Thing at a Time" chu Billboard 200 albums chart-ah kar riat chhung a zawnin pakhatna a ni tawh a, country music star hian kar hmasa chhung zawng khan equivalent unit 1,49,000 hralhchhuak lehin, a studio album pathumna hian tlangzarh kar bikah unit nuai 5 chuang a hralhchhuak hem mai a, kum 2021 hnua country album hlawhtling ber a ni.

Suga album hmasa ber, Taylor Swift leh a dang te

South Korean rapper, Suga solo debut album, track 10 awmna "D-Day" chu pahnihnaah la awmin, equivalent unit 1,40,000 zet a hralh a, BTS (Bangtan Boys) member zingah Jimin ("FACE") leh RM ("Indigo") hnua Billboard 200 top 10-a inhlangkai thei pathumna a ni ta a ni.

Taylor Swift Record Store Day-ah "Folklore: The Long Pond Studio Sessions" vinyl tlangzarh thar leh chu pathumnaah rawn langin, equivalent unit 75,000 a hralhchhuak a, kumina kar khat chhunga vinyl album hralhchhuak hnem ber record a rawn siam leh der.

Taylor Swift boruak len lai a ni a, a album dang "Midnights" chu palinaah rawn lang lehin, nikum October thla daih tawha tlangzarh a ni na chungin unit 62,000 lai a la hmuchhuak thei.

Hot 100 chart lam ve thung

Country music lal thar Morgan Wallen lead single "Last Night" chu kar hmasa lamah pahnihnaah han tla thla zuai mah se, rawn tho lehin a lallukhum chu SZA hnen aṭangin a la kir leh ta.

Kar hmasaa pakhatna SZA "Kill Bill" chu pahnihnaah a tla thla ta thung a, "Flowers" chu pathumnaah a la par a, hla thar "Ella Baila Sola" - Eslabon Armado X Peso Pluma leh "Un x100to" Grupo Frontera X Bad Bunny-te chu top 5 huangah an rawn inhlangkai a ni.