Rock And Roll Hall Of Fame-a lakluh tur zingah - Missy Elliott, Rage Against The Machine, The Spinners

Rock music leh rimawi lama mi bikte an lakluh ṭhinna - Rock and Roll Hall of Fame-a lawmluh turte hming chu a tahtawla puan chhoh zel a ni a, nimin khan pop icon pahnih Kate Bush leh George Michael chu inductee zingah hian telh thar an ni ve leh ta. An ni pahnih baka artist hming tarlan tawh te chu Missy Elliott, Sheryl Crow, Rage Against the Machine, The Spinners leh Willie Nelson-te an ni.

Rock and Roll Hall of Fame Foundation chairman John Sykes chuan, "Kumin hian music genre hrang hranga rock and roll nihna sawi fiahtu artist thlanchhuah an ni. New York-a November thlaa lawmluhna hun kan neih hunah music tan mellung pawimawh pahnih ; Willie Nelson kum 90 tlin lawmna leh hip-hop kum 50 tlin champha kan lawm rual dawn a ni," tiin thuchhuah a siam.

Artist-te hian an single hmasa ber an tihchhuah aṭanga kum 25 hnuah Hall of Fame nomination hi an hmu thei. Kate Bush hi ṭum thum - 2018, 2021 leh 2022 khan nominate tawh ni mah se, a tling zo ngai lo a, a vawi linaah erawh a thlan tlin a ni ta a ni. Missy Elliott hi kumin aṭangin thlan theih niin, a kum khatnaah a tling nghal a, Sheryl Crow leh Willie Nelson-te pawh nomination vawi khat an hmuhnaah thlan tlin an ni. Kum 2016-a boral, George Michael erawh fan vote hmanga thlan tlin a ni.

Kumina nominee thlan loh langsar zualte chu Cyndi Lauper, The White Stripes leh Joy Division/New Order-te an ni. Rock and Roll Hall of Fame Induction Ceremony vawi 38-na hi November 3 hian Barclays Center, Brooklyn-ah neih a ni ang.