Met Gala-a Priyanka Chopra ṭhi kha Rs vbc 200 chuang man

Priyanka Chopra chu Thawhlehni zing khan khawvela fashion event lian ber, Met Gala-ah a ṭum lina atan a pasal Nick Jonas nen an rawn inlan a, media mite mit la ber zing mi an ni nghe nghe.

Priyanka hian Valentino dress dum rawn inbelin, hei aia sawi zui hlawh ta erawh he ni a a ṭhin rawn awrh hi a ni. Priyanka hi Italian jewelry company, Bulgari brand ambassador ni lai a ni a, Met Gala-a a ṭhi awrh kha India pawisa chuan Rs vaibelchhe 204-205 inkar niin report chuan a tarlang. "Mipui khati zat kalkhawm zinga mi mit la ber pawl chu Chopra nghawnga 11.3-carat Bulgari diamond ṭhi kha a ni. He ṭhi hi Met Gala event zawhah market report aṭanga chhutin Rs vbc 205 in lilam a ni ang," tiin Vogue India chuan a tarlang.

Harper Bazaar UK thuchhuah tarlan danin, "single stone - the Bulgari Laguna Blu diamond hi USD maktaduai 25 man hu zet niin, 11.16-carat gem hi tuipui ang mai a pawl phat avangin he hming hi a pu zui ta a, kum 1970 khan zungbung ang tura chher hmasak a ni a; Sotheby-ah zawrhchhuah tura Bulgari blue diamond an chhawpchhuah lian ber a la ni.

Priyanka bakah hian Bulgari brand ambassador dang - Anne Hathaway pawhin Met Gala-ah khan an ṭhi man to hi a rawn awrh ve bawk.

Hetih lai hian, Priyanka hi lemchan khawvelah tunlai hian a ṭul ve hle a, "Citadel" buaipuia hun a hman zawhah Hollywood film 'Love Again' tihah Sam Heughan, Celine Dion leh Nick Jonas-te nen an chang ho leh dawn. Bollywood lamah pawh rawn kir tumin, Farhan Akhtar kutchhuak "Jee Le Zaraa"-ah Alia Bhatt leh Katrina Kaif nen kan hmuh chhunzawm bawk ang.