Ed Sheeran 'subtract' album a chhuak ta! Marvin Gaye Copyright thubuaiah thiam a chang!

Ed Sheeran chuan kumin kumtir khan album thar a tlangzarh tur thu a puang a, dawhthei taka min nghah tir hnuah a rimawi ngainatute tuihalna chu fahsakin, a studio album parukna subtract (-) chu nimin khan a tichhuak ta!

Ed Sheeran hian March 1, 2023 khan a social media platform hrang hrangah album title, tracklist leh tlangzarh ni turte hi a lo puang lawk tawh a, hemi ni la laa social media titi lailum luahtu a ni nghal. Ed hian Taylor Swift-i lockdown album pahnih - 'Folklore' leh 'Evermore'-a a thawhpui, Indie rock band 'The National' member, Aaron Dessner nen ṭangkawpin he album hi an buatsaih a ni.

Mathematical symbol album hnuhnung ber tur

Sheeran leh Dessner hian hla ṭha ber ber chhawpchhuak turin thla khat chuang chhung studio lamah an theihna leh thiamna zawng zawng an sawrbing a, hla 30 chuang an phuah hman. Mahse, acoustic singer-songwriter hi hla thu ṭha leh ruahṭham loh hla ṭha bik min fah fo ṭhintu a nih miau avangin a tawpah track 14 awmna album ni turin a hlate hi sawrzim ta a ni. Sheeran hi a ṭawng pawr duh lo a, tuna a hlate pawh hi an hlawhtlin vek a rin lem loh thu a sawi lawk nghe nghe.

Subtract hi eng nge?

Ed Sheeran hian album thara a hlate hi a nuna hun thim ber ber a tawn laia a phuah a nih thu a sawi. "Ka nun hi hlauhna, depression leh anxiety-in a khat a, ka nunah a vawi khatnan midang lawm zawng puanchhuah ka tum hauh lo. Keiman dik leh ṭha niha ka hriatte ka tarlang mai chauh a ni," tiin album chungchang a sawi.

Mathematical sign hmanga album siam ṭhin Sheeran hian a hmain + (2011), x (2014), ÷ (2017) leh = (2021) a lo tichhuak tawh a, subtract hi a mathematical album hnuhnung ber a ni ang.

A tawpah a nui ve ta

Sheeran chuan nikum nipui lai vel kha a hringnuna hun harsa a tawh nasat lai ber a nih thu sawichhuakin, a nupui Cherry Seaborn chuan tumour a nei tih an hmuchhuak a, an fa pahnihna an pai mek avangin zai ngam a ni lo a, thi mai thei dinhmunah a ding hman hial a ni. A ṭhianṭha ber, music entrepreneur ni bawk Jamal Edwards chu kum 31 mi niin cocaine overdose vangin a boralsan bawk.

Harsatnain a la kiansan mai lo a, buaina dang tawng chho lehin, kum 2017-a a tihchhuah "Shape of You" chu mi hla entawna phuah tiin a lakah thubuai an thehluh zui a, mahse a tawpah erawh thiam chang zawkah a ṭang leh a ni.

Buaina pakhat a paltlang hnuah buaina dangin a rawn tlakbuak leh; hetah pawh hian a hla chungchangah bawk niin, kum 2014-a a tihchhuah "Thinking Out Loud" chu 1973 classical hit Marvin Gaye "Let’s Get It On" entawnah puh ni lehin, he thubuai avang hian Ireland-a a pi vuina hun pawh a hmanpui theih loh thu leh hrehawm a tih thu Sheeran chuan a sawi hial. Sheeran chuan he lawsuit-ah hian thiam loh a chang a nih chuan rimawi a chawlhsan tur thu NYC court hmaah sawi hman hial mah se, court chuan thiam lohna a neih loh thu nimin khan a puang a, rimawi khawvelah kan la hmu chhunzawm zel dawn niin a lang.

Sheeran laka thubuai thehluttute chuan USD maktaduai 100 zetin Sheeran, Warner Music Group leh Sony Music Publishing-te hi an khing a, a tawpah erawh a dingchang zawkah an ṭang ta a ni.

Ed Sheeran hian mi pawi a sawi tam loin a nun hi a tlawm hle a, hei vang hian mipui nawlpui pawhin a zia hrim hrim hi an ngaina hle a ni. UK bikah phei chuan kum 2021 khan an hla hi an ngaithla tam ber a, nikum khan Harry Styles chauh phak loin pahnihna a la ni pha tho a ni. Tuna a album thar nen kum ṭha tak a hman chhunzawm ngei a beiseiawm chho tawh hle.