Super Bowl Halftime Show Entu ngah ber - Rihanna

Kumina Super Bowl Halftime Show ropui tak min hluitu, Rihanna zai lai chu show neih a nih hnua entu ngah berah Nielsen report chuan a tarlang.

Riri hi kum nga chhung live performance a neih loh hnuah Super Bowh Halftime show-ah ropui takin a rawn kir a ni. He show pekchhuah ni, February 12 khan entu mtd 118.7 an awm a, hemi hnuah entu hi mtd 3 chuanga an punbelh leh avangin record chelhtu, kum 2015-a Katy Perry performance (mtd 121) chu rawn khumin, he thu ziah lai thleng hian mi mtd 122 dawnin an en tawh a ni.

Glendale-a, Ariz.’s State Farm Stadium-a Kansas City Chiefs leh Philadelphia Eagles inkhelh ṭumah a rawn inlan hian Riri chuan khawvel hmuhah ASAP Rocky nen an inkara an fa pahnihna tur a pai mek tih a rawn lantir a, a hla - Billboard Hot 100 No. 1 hit “Only Girl (in the World),” “We Found Love,” “S&M,” “Rude Boy,” “Work” leh hla eng emaw zat a rawn sa a, fa a pai tih hriat loh khawpin performance ropui tak min hnutchhiah zui bawk.

He a halftime show avang hian Rihanna hian boruak a rawn nei lian hle a, a hla hlui ngaithlatu pawh nasa takin an pun phah bawk. RIAA chuan "We Found Love” tih hla chu certified Diamond-ah a hlang kai a, digital singles-ah Drake (184) leh Eminem (166) phak loin pathumnaah a awm mek a ni.