Zaithiam hmingthang Joseph Zaihmingthanga kan chân ta

Mizoram pum dengchhuak thei khawpa zaithiam lar, gospel/lengzem huanga a hming dai tawh ngai lo tur - Joseph Zaihmingthanga chuan nimin chhun dar 1:20 vel khan chatuan ram min pansan ta. Vawiin chawhma dar 12 hian Ramhlun Indoor Stadium-ah vui a ni ang.

Joseph-a hian nat lawkna hranpa a nei lo a, Pathianni chawhmaah pawh khan inkhawmin, a inkhawm bang a room-ah finrial ṭawngtaina nei tura a luh hnu lawkah an awmpui nula chuan thawm ri ring tak chu hriain a va tlan lut nghal a, a va en chuan nikhaw hre loin chhuatah a lo tlu a, hmanhmawh taka LRM Hospital panpui a nih hnuah doctor-te chuan a marphu an hmuh tawh loh thu leh, thisaa an rawn phurh thlen thu hrilhin, chhan tur a awm ta lo a ni.

Joseph Zaia hi Ramhlun North-ah khawsa mekin, fapa pahnih-Amosa leh Ropuia a kalsan a ni. A fapa upa zawk Ropuia hi Naupang Chawhnu inkhawm ah zai hruaitu a nih avangin inkhawm turin ngaih ṭha takin a kalsan a, a zai hruai lai chu a pa thih thuin a ṭhawng zui a ni.

Damdawi-in lam chuan Joseph hi heart attack vanga thi niin an puang a, a hmain nerve ṭha lo leh ril thlep avangte'n damdawi-in lamah enkawl a lo ni tawh ṭhin. A thih hma thleng hian a chhungte chuan insawiselna a neih loh thu leh, tunlai chu amah rau rauah pawh a hrisel ve lai tak a nih thu an sawi.

Joseph hi a zaithiam mai a ni lo a, lemchan thlengin a thiam hle. Nikum October thlaa tlangzarh 'Zeuh Keuh' film-ahte pawh zaithiam vek Alex Lalchhuankima-te nen pawh an lo changho tawh bawk a ni.

An vanglai chuan

Zoram mipuiin Joseph Zaia hi lengzem hla a sak aṭangin kan hmelhriat ṭan a, chumi hnuah Pathian hla rawn sa chho lehin, gospel hla ṭha tak tak min hnutchhiah a, chung zingah chuan "Nitin Lalpa' tih chu a larpui hle.

Joseph Zaia hian Vanlalsailova leh Robert Lalduhzuala-te nen Super Trio an din a, Zoram rimawi chanchina trio lar ber an ni zui. Mimal ṭheuha boruak an neih len zia hre phak tan chuan hemite pathum zai lai hmuh ringawt kha intihtheihna tham a tling ṭhin a, tun hun thleng pawha boruak nei lian ber ber an la ni phak reng a ni.